Түркиянын тышкы иштер министри Хакан Фидан, Израилдин Газада уланып жаткан согушу аймактагы ондогон жылдык өнүгүү жетишкендиктерин жокко чыгарганын жана бул агрессия токтотулбаса, глобалдык кесепеттерге алып келиши мүмкүн экенин эскертти.
“Эгер Израилдин агрессиясы жана экспансиясы көзөмөлгө алынбаса, анын кесепеттери дүйнө жүзү боюнча сезилет,” деп билдирди Хакан Фидан жекшемби күнү Бразилиянын Рио-де-Жанейро шаарында өткөн 17-БРИКС лидерлеринин саммитинде.
“Көп тараптуулукту бекемдөө, экономикалык-финансылык маселелер жана жасалма интеллект” деп аталган сессияда сөз сүйлөгөн Фидан, Израилдин кыймылдары тынчтык жана коопсуздукту камсыздоодон жооптуу эл аралык мекемелер үчүн кризисти жаратканын айтты.
“Палестин элинин трагедиясы азыр көп тараптуулук темасындагы сүйлөшүүлөрүбүздүн борборунда,” деген Фидан бул абалдын эл аралык тынчтык жана коопсуздукту сактоодон жооптуу мекемелердин мыйзамдуулугу жагынан олуттуу кризис экенин баса белгиледи.
Түркиянын аймактагы чыңалууну азайтуу жана тынчтыкчыл чечүүчү жолдорду колдоо багытында аракеттерин арттырганын маалымдаган Фидан, туруктуу тынчтыкка салым кошууга даяр экендиктерин билдирди.
Глобалдашуунун өз ара көз карандылыкты тереңдеткенин, өзгөчө энергетика жана маанилүү минералдар сыяктуу баалуулук чынжырларын алсыз кылып жатканын айтып, өнүгүүгө жетүү үчүн өсүү, жумуш менен камсыз кылуу жана эркин соода зарыл экенин баса белгиледи.
“Дүйнө көп полярдуулукка карай жылып жатканда, жасалма интеллекттин глобалдык башкаруусу маанилүү приоритетке айланууда,” деген Фидан “Жасалма интеллекттин жаңы үстөмдүк куралына айланышына жол бербөө үчүн зарыл чаралар көрүлүшү керек”,-деди.
