Вашингтон менен Пекин эки тарапка тең жогорку тарифтерди азайтуу боюнча болжолдуу макулдашууга жетишкенден кийин Кытайдын экспорту июнь айында 5,8 пайызга жогорулап, күтүлгөндөн ашып кетти.
Башкы Бажы башкармалыгынын маалыматына караганда, экспорт былтыркыга салыштырмалуу 5,8 пайызга өсүп, Bloomberg экономисттеринин 5 пайыздык болжолунан ашты.
Ал эми импорт 1,1 пайызга өсүп, күтүлгөн 0,3 пайыздан ашып, жылдын биринчи өсүшүн белгиледи.
Кытайдын экспорту 2024-жылы рекорддук деңгээлге жетиши күтүлүүдө, бул экономикалык басаңдоолорго карабастан олуттуу өсүштү камсыз кылууда.
Пекиндин өсүштү сактап калуу аракеттерине президент Дональд Трамптын кеңири тарифтери себеп болгон катуу соода согушу тоскоол болду. Анткен менен эки тарап өткөн айда Лондондо эки тараптуу келишим боюнча макулдашып, чыңалууну басаңдаткан.
Дүйшөмбү күнү жарыяланган бажы маалыматтары Кытайдын АКШга экспорту июнь айында 32,4 пайызга өскөнүн көрсөттү. Бул өткөн айдагы төмөндөөдөн кийинки күчтүү калыбына келтирүү деп эсептелет.
Капитал Экономисттин кытайлык экономисти Цзычуан Хуан: «Өткөн айда АКШ-Кытай соода элдешүүсүнөн улам экспорттун өсүшү бир аз кайра көтөрүлдү»,-деди.
Хуан тарифтер жогору бойдон кала бере турганын жана кытайлык өндүрүүчүлөрдүн бааларды төмөндөтүү аркылуу дүйнөлүк рыноктогу үлүшүн тез көбөйтүү мүмкүнчүлүгү барган сайын чектелип жатканын белгиледи.
«Ошондуктан, биз экспорттун өсүшү келерки чейректерде басаңдап, экономикалык өсүшкө терс таасирин тийгизет деп күтөбүз», - деп кошумчалады ал.
Бажы кызматкери Ван Линжун дүйшөмбү күнү пресс-конференцияда Пекин «АКШ Кытай менен ушул эле багытта кызматташууну улантат» деп күтөрүн айтты.
Мамлекеттик CCTV телеканалынын айтымында, Ванг тарифтерди алып салуу боюнча элдешүү «кыйынчылык менен түзүлгөн» деп айтты.
Ванг: «Шантаж жана мажбурлоо - чыгуунун жолу эмес. Диалог жана кызматташтык - туура жол», - деди.
Басаңдаган өсүү
Серепчилердин айтымында, Кытай экономикасы күчтүү экспорттун аркылуу экинчи чейректе 5 пайыздан ашык өсөт. Расмий маалыматтар шейшемби күнү жарыяланат.
Анткен менен адистер Трамптын соода согушу жылдын акыркы алты айында экономиканын кескин төмөндөшүнө алып келиши мүмкүн экенин эскертишүүдө.
Пекин быйыл 5 пайыздын тегерегинде өсүүнү максат кылууда. Бул көрсөткүч былтыркыдай болгону менен, көптөгөн адистер аны кыялдануу деп эсептешет.
Биринчи чейректеги 5,4 пайыздык өсүш күтүүлөрдөн ашып, экономиканы оң жолго салды.
Пандемиядан кийинки доордо Пекин узакка созулган кыймылсыз мүлк карызы кризиси, өнөкөткө айланган аз керектөө жана жаштардын жогорку жумушсуздугу менен күрөшүп жаткандыктан, өсүштү сактап калууда кыйынчылык тартып жатат.
Өткөн аптада жарыяланган маалыматтар керектөө бааларынын июнь айында бир аз көтөрүлүп, дефляциянын төрт айлык мезгилин аяктаганын көрсөттү. Бирок, фабрика өндүрүшүнүн баасы дээрлик эки жылдагы эң ылдам темп менен төмөндөдү.
Көптөгөн экономисттер Кытай инфраструктуралык инвестицияларга, өндүрүшкө жана экспортко багытталган салттуу өсүү моделинен ички керектөө тарабынан колдоого алынган моделге өтүшү керек деп ырасташат.
Пекин өткөн жылдан бери керектөөнү жогорулатуу үчүн көптөгөн чараларды ишке ашырды. Бул чараларга чекене соода ишин убактылуу күчөткөн керектөөчү товарларды алмашуу субсидиялоо программасы кирет.
