АКШнын Ирандагы үч өзөктүк объектти аткылаганы тууралуу билдирүүсүнө дүйнө лидерлеринин реакциясы ар түрдүү болду. Израиль президенти Дональд Трамптын чечимин колдосо, БУУ чыңалууну азайтууга чакырды, ал эми айрым өлкөлөр бул чабуулдарды айыпташты.
БУУнун баш катчысы Антониу Гутерриш:
“АКШнын бүгүн Иранга карата күч колдонгону мени терең тынчсыздандырды. Бул кадам чыңалуу жогорку деңгээлде турган аймакта кооптуу эскалация болуп саналат жана эл аралык тынчтык менен коопсуздукка түздөн-түз коркунуч туудурат.
Бул жаңжалдын тез арада көзөмөлдөн чыгып кетүү коркунучу өсүүдө – бул карапайым адамдар, аймак жана дүйнө үчүн кыйратуучу кесепеттерге алып келиши мүмкүн. Мен мүчө мамлекеттерди чыңалууну азайтууга жана БУУнун Уставы менен эл аралык укуктун башка эрежелерин сактоого чакырам. Бул кооптуу учурда баш аламандыкка жол бербөө өтө маанилүү. Аскердик чечим жок. Жалгыз жол – дипломатия. Жалгыз үмүт – тынчтык”,-деп билдирди.
Израилдин премьер-министри Биньямин Нетаньяху:
“Куттуктайм, президент Трамп. АКШнын күчтүү жана адилеттүү күчү менен Ирандын өзөктүк объекттерин бутага алуу боюнча сиздин чечкиндүү кадамыңыз тарыхты өзгөртөт... Тарых президент Трамптын дүйнөдөгү эң кооптуу режимди эң кооптуу куралдардан ажыратуу үчүн аракет кылганын жазып калтырат”,-деди.
Венесуэланын тышкы иштер министри Иван Гил:
“Венесуэла АКШнын Иранга карата аскердик агрессиясын айыптайт жана чыр-чатакты токтотууну талап кылат.
Боливардык Венесуэла Республикасы Израилдин талабы боюнча АКШнын аскердик күчтөрү тарабынан Иран Ислам Республикасынын өзөктүк объекттерине, анын ичинде Фордо, Натанз жана Исфахан комплекстерине жасалган бомбалоону катуу жана чечкиндүү айыптайт”,-деп айтты.
Мексиканын Тышкы иштер министрлиги:
“Министрлик Жакынкы Чыгыштагы жаңжалга катышкан тараптардын ортосунда тынчтык үчүн дипломатиялык диалогду тез арада баштоого чакырат.
Биздин өлкөнүн тышкы саясаттагы конституциялык принциптерине жана тынчтыкты жактаган позициябызга ылайык, аймактагы чыңалууну азайтууга чакыруубузду кайталап жатабыз. Аймактагы мамлекеттердин ортосунда тынчтыкта жашоону калыбына келтирүү эң жогорку артыкчылык болуп саналат”,-деп айтылды.
Кубанын президенти Мигель Диас-Канель:
“Биз АКШнын Ирандын ядролук объекттерин бомбалоосун катуу айыптайбыз, бул Жакынкы Чыгыштагы жаңжалды кооптуу деңгээлге көтөрөт. Бул агрессия БУУнун Уставын жана эл аралык укукту олуттуу түрдө бузуп, адамзатты кайтарылгыс кесепеттерге алып келүүчү кризиске түртөт”,-деп айтты.
Бул тизмеге башка өлкөлөрдүн реакциялары кошулушу мүмкүн.
