Геосаясий чыңалуулар жана экономикалык белгисиздик шартында алтын биринчи жолу 5000 доллардан ашты
АКШнын тышкы саясатындагы кадамдардан жана глобалдык тобокелдиктерден келип чыккан рыноктук тынчсыздануу коопсуз активдерге суроо-талапты жогорулатты.
Дүйшөмбү күнү алтындын баасы рекорддук өсүшүн улантып, биринчи жолу 5000 долларлык деңгээлден ашты. Буга геосаясий жана экономикалык белгисиздиктин уланып жатканы жана коопсуз активдерге суроо-талаптын жогорулашы себеп болду.
Түркия убактысы боюнча саат 07:00ге карата алтындын баасы болжол менен 2,2%га жогорулап, унциясына 5090,8 долларды түздү. Андан соң күндүз тарыхтагы эң жогорку көрсөткүч болгон 5111,11 долларга жетти. Баалар жума ичинде болжол менен 9,1%га жогорулады.
Алтын акыркы 12 айда болжол менен 84%га, ал эми жыл башынан бери 17%га өстү, буга сооданын жана геосаясий чыңалуулардын өсүшү, ошондой эле ири борбордук банктардын пайыздык чендерди төмөндөтүшү түрткү болду.
Ал эми күмүш унциясына 107,6 долларды түзүп 4,6% өсүү менен рекорддук 109,46 долларга жетти. Күмүштүн баасы акыркы бир жылда 252%дан ашык өстү.
Рынок аналитиктери бул өсүштөрдө АКШнын президенти Дональд Трамптын Гренландияга байланыштуу талаптары менен катар геосаясий тынчсызданууларды маанилүү фактор катары атап жатышат.
Рыноктун тынчсыздануусун күчөткөн дагы бир элемент Трамптын Ирандагы кырдаал боюнча билдирүүлөрү болду.
Трамп ошондой эле ишемби күнү эгер Оттава Пекин менен соода келишимине жетишсе, АКШга кирген бардык канадалык товарларга 100% тариф киргизем деп коркуткан.
Трамп Truth Social социалдык медиа платформасында: "Эгер Канада Кытай менен келишим түзсө, АКШга кирген бардык канадалык товарлар жана продукциялар дароо 100% тарифке дуушар болот", - деп жазган.