“Украина президенти Владимир Зеленский тынчтык үчүн Орусияга аймакты берүүгө таптакыр макул болбойт” деп билдирди президенттик аппараттын башчысы Андрей Ермак бейшемби күнү The Atlantic басылмасына.
Ермак журналга: "Зеленский президент болуп турганда эч ким бизден аймакты берет деп күтпөшү керек. Ал аны өткөрүп бербейт", - деди. Бул сөздөр менен Ермак Киевдин орусиялык күчтөр басып алган аймакты бербей тургандыгы жөнүндөгү көптөн берки позициясын тастыктады.
Ермактын билдирүүсү Орусиянын президенти Владимир Путин эгерде украин аскерлери Кремль өзүнүкү деп эсептеген жерлерден чыгып кетсе, Москва чабуулун токтотот; болбосо орусиялык күчтөр аларды күч менен басып алат деп эскерткенден кийин айтылды.
Кыргызстанга сапары учурунда маалымат берген Путин: "Эгер украин күчтөрү өздөрү ээлеп турган аймактардан чыгып кетсе, биз согуштук аракеттерди токтотобуз. Чыгып кетпесе биз муну аскердик жол менен ишке ашырабыз", - деди.
Орусия учурда Украинанын аймагынын болжол менен бештен бир бөлүгүн көзөмөлдөйт жана басып алынган аймактардын статусу тынчтык процессиндеги негизги тоскоолдук бойдон калууда.
Орусиянын аскерлери Украинанын чыгышында жай, бирок оор алдыга жылууну улантууда, ал жерде украин аскерлеринин саны жана ок атуучу күчү жагынан алсыз.
АКШнын тынчтык планы
Ошол эле учурда Вашингтон дээрлик төртүнчү жылына кирген согушту токтотуу боюнча аракеттерин кайрадан жандандырып, Москва менен Киевди камтыган келечектеги сүйлөшүүлөрдө АКШнын расмий өкүлдөрү алдыга жылдырууну көздөгөн күтүлбөгөн тынчтык планын сунуштады.
Маалыматтарга караганда, европалык өнөктөштөр менен кеңешпестен иштелип чыккан пландын баштапкы долбоорунда Украинанын чыгыш Донецк аймагынан чыгып кетиши жана АКШнын Донецк, Крым жана Луганск аймактарын Орусиянын аймагы катары таануусу каралган.
Киев Орусиянын жетишкендиктерин мыйзамдаштыра турган ар кандай келишимди четке какты.
Украиналык расмий өкүлдөр ошондой эле келечектеги Орусиянын агрессиясын токтотуу үчүн ар кандай сүйлөшүлгөн келишимге Батыштын күчтүү коопсуздук кепилдиктери кириши керектигин билдиришти.
