Түркиянын улуттук авиакомпаниясы Turkish Airlines жана арзан баада кызмат көрсөткөн AJet, жалпы улуттук нааразычылык акцияларына байланыштуу аймактык окуялардын себебинен Иранга бир катар учууларды токтотту.

Түрк аба жолдору жума жана ишемби күндөрү үчүн Тегеран, Тебриз жана Мешхедге пландаштырылган 17 каттам жокко чыгарылганын жарыялады.

Авиакомпания: "Ирандагы аймактык окуяларга байланыштуу 9-январь жума жана 10-январь ишемби күндөрү Тегеран, Тебриз жана Мешхедге пландаштырылган 17 каттам жокко чыгарылды", - деп билдирип, жүргүнчүлөргө расмий веб-сайтынан каттамдардын учурдагы абалын текшерип турууну сунуштады.

Түркиянын арзан баада кызмат көрсөткөн авиакомпаниясы AJet да ошол эле эки күндүк мезгилде Ирандын борбору Тегеранга алты каттамдын жокко чыгарылганын жарыялап, "Ирандагы аймактык окуяларга байланыштуу 9-январь жума жана 10-январь ишемби күндөрү Тегеранга пландаштырылган жалпысынан 6 каттам жокко чыгарылды" деп билдирди жана жүргүнчүлөргө өзгөрүүлөр тууралуу маалымат берилгенин кошумчалады.

Иран декабрь айынын аягынан бери риалдын кескин девальвациясы жана экономикалык абалдын начарлашы менен башталган нааразычылык акцияларынын толкунуна туш болуп келет. Демонстрациялар Тегерандын Чоң базарында 28-декабрда башталып, андан соң өлкөнүн башка көптөгөн шаарларына жайылды.

Иран бийлиги курмандыктар боюнча расмий маалыматтарды жарыялай элек.