Украинанын президенти Владимир Зеленский бейшемби күнү Түркияда Орусиянын президенти Владимир Путинди күтөөрүн билдирди. Бул билдирүү эки өлкөнүн ортосундагы согушта бир нече айга созулган туңгуюктан кийин дипломатиялык аракеттердин жандана баштаганын көрсөтүүдө.
Зеленский жекшемби күнү X платформасында: "Дипломатия үчүн керектүү негизди камсыз кылуу үчүн эртеңден тарта толук жана туруктуу ок атышпоону күтөбүз... Өлтүрүүнүн мындан ары узартылышынын эч кандай пайдасы жок. Бейшемби күнү Путинди Түркияда күтөм. Бул жолу орустар шылтоо издебейт деп үмүттөнөм" деди.
Анын бул сөздөрү Путиндин 15-майдан тарта Стамбулда Украина менен түз сүйлөшүүлөрдү кайра баштоого даяр экенин жарыялагандан кийин айтылды.
АКШнын президенти Дональд Трамп жекшемби күнү X платформасындагы билдирүүсүндө Украинаны бул сунушту кабыл алууга чакырды. “Орусиянын президенти Путин Украина менен ок атышпоо келишимин түзгүсү келбейт, бирок Түркияда бейшемби күнү жолугуп кан төгүүнү токтотуу боюнча сүйлөшүү өткөрүүнү каалайт. Украина муну ДАРОО кабыл алышы керек... Мен Украинанын, Экинчи Дүйнөлүк согуштагы жеңишти майрамдоо менен алек болгон Путин менен келишим түзөөрүнөн күмөн санай баштадым… ЖОЛУГУШУУНУ ДАРОО ӨТКӨРГҮЛӨ!!!” деди.
Түркия Путиндин сунушун колдоду
Москвада өткөргөн маалымат жыйынында Путин дүйшөмбү күнү Түркиянын президенти Режеп Таййип Эрдоган менен телефон аркылуу байланышып, сүйлөшүүлөрдү өткөрүү үчүн расмий түрдө Түркиянын колдоосун сурай турганын айтты. “Орусия эч кандай шарт койбостон сүйлөшүүгө даяр,” – деп кошумчалады Путин.
Түркиянын президенти Режеп Таййип Эрдоган да Стамбулда Орусия менен Украинанын ортосундагы тынчтык сүйлөшүүлөрүн кайра баштоо боюнча Путиндин билдирүүсүн кубаттап, 2022-жылы токтогон сүйлөшүүлөрдү улантууну колдой турганына кубанганын билдирди.
Эрдоган Түркиянын туруктуу чечимге жетүү үчүн сүйлөшүүлөрдү өткөрүүгө даяр экенин дагы бир жолу баса белгиледи. 2022-жылдын март айында жаңжал башталгандан кийин дароо куралдуу жаңжалды токтотуу үчүн Стамбул жалпы пикир табуу максатында сүйлөшүүлөрдү өткөргөн, бирок согушту токтотуу боюнча келишимге жетишиле алган эмес.
Көптөн бери согуштун токтотулушу үчүн аракет кылып келген Эрдоган Түркиянын тынчтык сүйлөшүүлөрүн өткөрүү жана маселени чечүү үчүн колунан келгендин баарын кылууга даяр экенин бир нече жолу кайталады.
Түркия Орусия менен да Украина менен да жакшы мамиледе болуу өзгөчөлүгүнө ээ.
