Түркиянын соода министри Өмер Болат Европа Биримдиги (ЕБ) менен Бажы биримдигин жаңыртуу жаатында электрондук коммерция, мамлекеттик сатып алуулар, инвестициялар жана айыл чарба продукциялары сыяктуу айрым тармактарда ийгиликтерге жетишилгенин билдирди.
Брюсселге болгон сапары учурунда журналисттерге маалымат берген Болат Бажы биримдигин жаңыртуу боюнча сүйлөшүүлөрдү расмий баштоо үчүн ЕБ Кеңеши Европа комиссиясына азырынча уруксат бере электигин, бирок техникалык сүйлөшүүлөр башталганын айтты.
Болат Бажы биримдиги Европа Биримдигине да, Түркияга да чоң пайда алып келгенин эске салып: «Түркия менен ЕБнин ортосундагы соода жүгүртүү 30 жылда 11 эсеге көбөйүп, 233 миллиард долларга жетти. Демек, бул — эки тарапка тең пайда алып келген мамиле», — деди.
Өнөр жай жана санариптик соода
Министр Түркия акыркы бир жылда Европа Биримдиги сунуштаган Өнөр жайды тездетүү мыйзамындагы (IAA) чектөөчү жоболорго байланыштуу тынчсызданууларды чечүүгө аракет кылганын белгиледи. Анын айтымында, бул жоболордо, өзгөчө, автомобиль өнөр жайына жана электр унааларына келечекте инвестиция салууга байланыштуу чектөөлөр камтылган.
Болат санариптик соода жаатында Европа Биримдиги өз мыйзамдарын даярдоодо Түркия менен координация жүргүзүп жатканын билдирди. Ошондой эле Түркия 1-июлда ЕБ тарабынан киргизилген, ар бир пакет үчүн 3 евро өлчөмүндө төлөм алууну караган эрежеден бошотулганын эске салды.
Саясатчылар менен парламенттин ишке аралашуусу жагымсыз чечимдердин кабыл алынышына алып келиши мүмкүн экенин белгилеген министр Түркияны «Европа Биримдигинде жасалган» категориясына кошууну колдогон көптөгөн европалык расмий өкүлдөр бар экенин айтты.
Ошол эле учурда Европа Биримдиги ар кандай экономикалык кызыкчылыктарга ээ өлкөлөрдөн турарын белгилеген Болат «сабырдуу жана акыл-эстүү» мамиле кылууга чакырды.
