Индиянын күчтөрү Индия башкарган Кашмирде кеминде тогуз үйдү жардырып, жок кылышты. Алар бул үйлөрдү кашмирдик козголоңчуларга таандык деп билдиришти.
Ишемби күнү жергиликтүү бир нече гезиттер Индия армиясы тарабынан Шринагар шаарында жүргүзүлгөн рейддер учурунда кеминде тогуз үйдүн жардырылган видеолорун бөлүштү. Индия полициясы тараткан маалыматта Шринагар шаарында түрдүү индиялык түрмөлөрдө камалып жаткан адамдарга таандык 63 үйгө рейд жүргүзүлгөнү айтылган.
Полиция район боюнча кеңири издөө жана курчоо операциялары жүргүзүлгөнүн жарыялады. Кашмирде 1500дөн ашуун адам кармалып, кысым күчөгөнү байкалууда.
The Indian Express гезити Бандипора районунда камактагы кашмирдик козголоңчунун бир тууганы өлтүрүлгөндөн кийин нааразылык акциялары башталганын билдирди. Жергиликтүү тургундар бул окуяны “жасалма кагылышуу” деп аташса, Индия армиясы аны согушкер деп айыптады.
Индия полициясы Индия башкарган Кашмирдин Анантнаг районунда 175 адам кармалганын билдирди. Бул аймакта өткөн жумада белгисиз куралчандар тарабынан 26 адам өлтүрүлгөн.
Бул кол салуу ядролук куралга ээ кошуна мамлекеттердин ортосунда чыңалууну күчөттү. Индия бул чабуулга чек аранын аркы жагынан байланыш бар деп айыптап бир катар чара көрдү. Бул чараларга 1960-жылдагы суу бөлүшүү боюнча маанилүү келишим болгон Инд суу келишимин токтотуу, пакистандык дипломаттарды чыгаруу, пакистандык визаларды жокко чыгаруу жана маалымат каражаттарына көзөмөлдү күчөтүү кирет.
Исламабад бул айыптоолорду кескин четке кагып, индиялык дипломаттарды өлкөдөн чыгарып жатканда индиялык жарандарга виза берүүнү токтотту. Мындан тышкары, аба мейкиндигин жабуу жана үчүнчү өлкөлөр аркылуу сооданы токтотуу да каршы жооп болуп саналат.
Пакистан Индиянын Инд суулары келишиминин алкагындагы суунун агымына тоскоолдук кылуу же башка нукка буруу аракетин «согуш жарыялоо» катары карай турганын жана келишимди бир тараптуу токтото албай турганын баса белгиледи.
Бир тараптан Электроника жана маалымат технологиялары министрлиги медиа уюмдарына «улуттук коопсуздук» деген жүйө менен коргонуу операцияларын же коопсуздук күчтөрүнүн кыймылдарын түз көрсөтүүгө тыюу салган эскертүү берди.
Кашмир Индия менен Пакистандын ортосундагы жаңжалдын чордонунда турат. Эки өлкө тең аймакты ээлегени менен анын бир бөлүгүн гана башкара алат.
