Польшанын Аскер-аба күчтөрүнүн согуштук учактары шейшемби күнү Балтика деңизинин үстүндөгү учуу планы жок жана транспондери өчүрүлгөн абалда эл аралык аба мейкиндигинде учуп бараткан Орусиянын Ил-20 чалгындоо учагын кармады. Польшанын Куралдуу күчтөрү шаршемби күнү жасаган билдирүүсүндө окуяны тастыктады.
Операциялар боюнча командачылыктын билдирүүсүндө: «Польшанын согуштук учактары учуу планы жок жана транспондери өчүрүлгөн абалда эл аралык аба мейкиндигинде чалгындоо миссиясын аткарып жаткан Ил-20 учагын кармады», - деп айтылат.
Командачылыктын өкүлү Яцек Горышевский TVN24 каналына берген маегинде бул окуя Польшанын аба мейкиндигин коргоодогу сергектигин көрсөттү деп билдирди.
Сентябрда үч орусиялык аскердик учак Эстониянын аба мейкиндигин кыска убакытка бузуп, 20дан ашык орусиялык дрон Польшага киргени тууралуу маалыматтардан кийин НАТОнун чыгыш канатынын мүчөлөрү мүмкүн болгон мыйзам бузууларга каршы жогорку даярдыкта турушат.
Орусия ошол учурда Польшаны бутага алганын четке какты. Орусиянын Коргоо министрлиги: «Польшанын аймагындагы буталарга сокку уруу планы болгон эмес. Чабуулда колдонулган орусиялык дрондордун аралыгы айтылгандай Польшанын аба мейкиндигине кирүүгө жетиштүү эмес - ал 700 километрден ашпайт. Бирок, биз бул маселе боюнча Польшанын Коргоо министрлиги менен кеңешүүгө даярбыз», - деп билдирди. Өткөн аптада НАТОнун Европадагы Бириккен куралдуу күчтөрүнүн жогорку башкы командачысы, АКШнын Аскер-аба күчтөрүнүн генералы Алексус Гринкевич Рейтер агенттигине Москва өткөн айдагы НАТОнун катуу жообунан чочулап жаткандай көрүнгөнүн, бирок Орусия альянстын чектерин сынап көрүүнү уланта аларын эскерткен.
