Өзбекстандын президенти Шавкат Мирзиёев педофилия кылмышы үчүн өмүр бою эркинен ажыратуу жазасын киргизүү тууралуу жарлыкка кол койду.

Өзбекстандын президенттиги шейшемби күнү жарлыкка кол коюлганын билдирди. Мирзиёев буга чейин министрликтер аралык кеңештин жыйынында аялдардын жана балдардын укуктарын коргоо системасын мындан ары да чыңдоого багытталган сунуштарды жана демилгелерди карап чыккан.

Билдирүүдө жобого аялдар менен балдарга карата кыянаттык жана зомбулук учурларынын алдын алууга багытталган сунуштар жана жаңы демилгелер да киргизилгени жана бул маселелер жогорку деңгээлде бир нече жолу талкууланып, укук коргоо органдарына жана башка тиешелүү мамлекеттик органдарга конкреттүү тапшырмалар берилгени белгиленди.

"Бул багыттагы аракеттерди координациялоо максатында кыска мөөнөттүн ичинде практикалык сунуштарды иштеп чыгуу боюнча ведомстволор аралык кеңеш түзүлгөн", — деп айтылып, жыйында аталган кеңеш тарабынан даярдалган демилгелерге коомчулуктун сунуштары, эксперттердин кеңештери жана эл аралык алдыңкы тажрыйбалардын негизинде баа берилгени билдирилди.

Билдирүүдө каралып жаткан демилгелердин арасында сексуалдык ыдык көрсөтүү үчүн жазаларды күчөтүү максатында беш күнгө чейин административдик камакка алуу жана педофилия үчүн өмүр бою эркинен ажыратуу сыяктуу сунуштардын бар экени айтылды.

Ошондой эле, билдирүүдө: "Президент сунушталган демилгелерди жактырып, тиешелүү жарлыкка кол койду жана бийлик органдарына жаңы чараларды коомчулукка кеңири түшүндүрүүнү тапшырды", - деп кошумчаланды.