Франция бейшемби күнү Сенегалдагы акыркы эки аскердик базасын өткөрүп берип, француз армиясынын Батыш жана Борбордук Африкада туруктуу базасы калган жок.

Сенегалдын мурдагы колониялык державасы, Батыш Африка өлкөсүндөгү эң ири базасы Кэмп Гейлди жана Дакар аэропортундагы аба майданын француз жана Сенегалдын жогорку даражалуу расмий өкүлдөрү катышкан аземде өткөрүп берди.

2024-жылкы шайлоону радикалдуу өзгөрүү убадалары менен жеңген Сенегалдын президенти Бассиру Диомае Файе Франциядан 2025-жылга чейин аскерлерин өлкөдөн чыгарып кетүүнү талап кылган.

Буркина-Фасо, Мали жана Нигер сыяктуу мурдагы француз колонияларынын лидерлеринен айырмаланып Файе, Сенегалдын Париж менен кызматташууну уланта турганын баса белгиледи.