Черногориянын тышкы иштер министри Эрвин Ибрагимович өлкөсүнүн Түркия менен визасыз саякаттоону токтотуу чечими 10-15 күндүн ичинде жокко чыгарыларына ишенгенин билдирди.
Ибрагимович расмий сапар менен Черногорияга барган Германиянын тышкы иштер министри Йоханн Вадефул менен дүйшөмбү күнү Черногориянын борбор шаары Подгорицада пресс - жыйын өткөрүп жаткан учурда келген суроого : “Премьер - министр Милойко Спайич менен тынымсыз байланыштабыз. Түркия менен визасыз саякаттоону токтотуу чечиминин 10- 15 күндүн ичинде жокко чыгарыларына ишенем”,- деди.
Ибрагимович визасыз режим токтотулгандан кийин Черногориядагы Түркиянын дипломатиялык өкүлчүлүктөрүнө келген адамдардын саны кескин көбөйгөнүн билдирди.
25-октябрда бир черногориялыкка жасалган бычак менен кол салуу жергиликтүү маалымат каражаттарында алгач түрк жарандарынын катыштыгы бар деп кабарланган. Бул Подгорицанын айрым жерлеринде Түркияга каршы маанайдын күчөшүнө алып келди жана премьер-министр Милойко Спайичтин Түркиянын жарандары үчүн визасыз режимди убактылуу токтото туруу чечимин чыгарышына себеп болду.
Черногория Жогорку Соту 31-октябрда шаарда бычак менен кол салууга катышы бар деп кармалган эки адамдын окуяга тиешеси жок экени аныкталгандан кийин бошотулганын жарыялады.
