Орусия жума күнү Украинаны өзөктүк электр станциясына кол салуу максатында учкучсуз учуучу аппарат жөнөттү деп айыптады. Москва Киевдин түн ичинде жасаган эң ири чабуулдарынын биринде 200дөн ашуун украиналык учкучсуз аппаратты атып түшүргөнүн билдирди.
Украина бир нече айдан бери Орусиянын энергетикалык объектилерине дрон чабуулдарын жасап келет жана буларды Москванын чабуулдарына жооп катары сыпаттоодо.
Орусиянын өзөктүк энергия агенттиги Росатом бир учкучсуз аппараттын Москвадан 300 чакырымдай батышта жайгашкан Смоленск атомдук станциясын бутага алганын билдирди.
«Смоленск өзөктүк электр станциясынын үчүнчү энергия блогунун жанында украиналык согуштук дрон абадан коргонуу системалары тарабынан жок кылынды», – деп маалымдалды.
Дрондун калдыктары айрым терезелерди талкалаганы менен олуттуу зыян же жаракаттар катталган жок. Росатом станциянын ишин улантканын жана радиация деңгээлинде өзгөрүү болбогонун кошумчалады.
Украина менен Орусия кагылышуу башталгандан бери бири-бирин өзөктүк объектилерди бутага алууда деп айыптап келет. Бул жагдай Эл аралык атомдук энергия агенттигинин тынчсыздануусун жараткан.
Орус аскерлери 2022-жылдын февраль айындагы аскердик операциясынын биринчи күнүндө Чернобыл атомдук электр станциясын басып алып, бир айдан кийин чыгып кеткен. Москва ошондой эле Украинанын түштүгүндөгү Запорожье атомдук электр станциясын да басып алган жана аны көзөмөлдөөнү улантууда.
Орусиянын коргоо министрлиги түн ичинде Украинага таандык 221 дронду атып түшүргөнүн билдирди. Украинанын Аба күчтөрү болсо Орусиянын түнкү чабуул учурунда 40 учкучсуз апаратты учурганын, бул адаттагыдан бир топ аз экенин маалымдады.
Орусиянын Ленинград облусунун губернатору Александр Дрозденконун айтымында, Балтика деңизиндеги Приморск портунда бир кемеде өрт чыкты. Бирок өрт көзөмөлгө алынып, мунай төгүлүү коркунучу жок экени кабарланды.
Бул кол салуулар Польша Орусияны өз аймагына дрон чабуулун жасады деп айыптагандан кийин болду. Москва бул дооматтарды четке кагып, дрондордун орусиялык экенин далилдеген эч кандай факт жок экенин билдирди.
