Саламаттыкты сактоо министрлиги Ооганстандын түндүгүндө болгон 6,3 баллдык жер титирөөдөн кеминде 20 адам каза таап, болжол менен 320 адам жаракат алганын билдирди.

Министрликтин басма сөз катчысы Шерафат Заман видео кайрылуусунда Балх жана Саманган провинцияларында "болжол менен 320 жаран жаракат алып, 20дан ашык адам каза болгонун" айтты жана бул сандар алдын ала маалыматтар экенин кошумчалады.

АКШнын Геологиялык изилдөөлөр кызматы (USGS) жер титирөө жекшемби күнү GMT боюнча кечки саат 8:30 чамасында өлкөнүн эң ири шаарларынын бири Мазари-Шарифтин жанында 28 километр (17,4 миль) тереңдикте болгонун билдирди.

Германиянын Геологиялык изилдөө борбору болсо жер титирөөнүн күчү 6.4 баллга жеткенин маалымдады.

31-августта Ооганстандын тарыхындагы эң катуу жер титирөөлөрдүн бири болгон 6,0 баллдык жер титирөө өлкөнүн чыгышында катталып, 2200дөн ашык адамдын өмүрүн алган.

Афганистанда жер титирөөлөр көп кездешет, өзгөчө Евразия жана Индия тектоникалык плиталарынын кесилишинде жайгашкан Гиндукуш тоо кыркаларынын аймагында.

Британ геологиялык кызматынын сейсмологу Брайан Баптинин айтымында, Ооганстандын түндүк-чыгышында 1900-жылдан бери күчү 7 баллдан ашкан 12 жер титирөө катталды.