АКШнын Ички коопсуздук министри Кристи Ноемдин айтымында, президент Дональд Трамп январь айында кызматка киришкенден бери өлкө боюнча 480 миңден ашуун документи жок мигрант кармалды.
Дүйшөмбү күнү Флоридада маалымат жыйынында сөз сүйлөгөн Ноем, "Январь айынан бери Улуттук коопсуздук департаменти 480 миңден ашуун кылмыштуу мигрантты кармады. Бул адамдардын 70 пайызы айыпталууда же соттолду" деди.
«Биз өлкө боюнча коомчулуктарды коопсуз кылып жатабыз, ушундайча үй-бүлөлөр өнүгүп, бакубатчылыкта жашай алышат жана бул өлкө негиздеген баалуулуктарды сезе алышат», – деп кошумчалады.
Өткөн айда департамент 20-январдан бери 2 миллион мыйзамсыз мигрант АКШдан чыгып кеткенин жарыялаган. Билдирүүгө ылайык, алардын 1,6 миллиону өз ыктыяры менен чыгып кетсе, 400 миңден ашууну расмий депортацияланган.
‘Рекорддук көрсөткүч’
Ошол эле учурда Дональд Трамп дүйшөмбүдөгү билдирүүсүндө, ФБРдин зордук-зомбулук кылмыштары, баңги операциялары жана балдарды коргоо аракеттери боюнча жаңы маалыматтарына шилтеме жасап, анын башкаруу мезгилиндеги укук коргоо органдарынын ишинин "рекорддук деңгээлин" мактады.
Трамп «Менин администрациямдын тушунда ФБР укмуштуудай иш алып барууда. 20-январдан бери 28 миңден ашуун зомбулук кылмышкери кармалды (рекорддук көрсөткүч!), 6000ден ашуун мыйзамсыз курал-жарак колго түшүрүлдү, балдарга зыян келтирген 1700дөн ашуун кылмышкер жана 300 адам аткезчиси көчөлөрдөн тазаланды», – деп жазды Truth Social платформасында.
Ал ошондой эле 5000 бала куткарылганын жана агенттер 1900 килограмм фентанилди колго түшүргөнүн, мунун "125 миллион адамды өлтүрүүгө жетиштүү санда" экенин айтты.
«Биз АКШга МЫЙЗАМДУУЛУКТУ ЖАНА ТАРТИПТИ кайра алып келип жатабыз. Каш, Дэн, Эндрю жана ФБРдин эр-азаматтары менен айымдары укмуштуудай иш жасап жатышат, АМЕРИКАНЫ КООПСУЗ АБАЛГА АЛЫП КЕЛҮҮДӨБҮЗ!» – деп жазды.
