Россиянын түнү менен Украинага жасаган чабуулунан төрт адам каза болуп, 30дан ашууну жаракат алды. Москва Украинанын түштүк-чыгышындагы Днепр шаарына жана башка аймактарга карата чабуулда 660тан ашык дрон жана ракета колдонду.
Украинанын президенти Владимир Зеленский социалдык медиадагы билдирүүсүндө: "Орустар Днепрди жана башка шаарларды жана калктуу конуштарды дээрлик түнү бою бомбалашты", - деп билдирди жана буталардын көпчүлүгү шаардык инфраструктура болгонун кошумчалады.
Аймактын губернатору Александр Ганжа Днепрдеги орус чабуулунан жабыркаган имараттан эки адамдын сөөгү табылганын жана дагы беш адамдын урандылардын астында калышы мүмкүн экенин айтты. Ганжа ошондой эле шаарда 21 адам жаракат алганын жарыялады.
Ал эми өлкөнүн түндүгүндөгү Чернигов облусунун губернатору ракеталык жана дрондук чабуулдардан эки адам каза болуп, жети кишинин жаракат алганын билдирди.
Зеленский: "Мындай ар бир чабуул өнөктөштөрүбүзгө кырдаалдын канчалык курч экенин жана абадан коргонуубузду тез арада күчөтүү үчүн чечкиндүү кадамдарды жасоо зарылдыгын эскертип турушу керек", - деди.
Украинанын аба күчтөрү Telegram баракчасында Россиянын Украинага 619 дрон жана 47 ракета менен кол салганын, алардын ичинен 580 дрон жана 30 ракетанын атып түшүрүлгөнүн жарыялады.
Россия Украинага күн сайын түнү менен ондогон дрон менен кичине масштабдагы чабуулдарды жасап, айрым учурларда жүздөгөн дрондорду жана ондогон ракеталарды колдонуп, чоң масштабдагы чабуулдарды ишке ашырууда.
