Индия, Польша жана Венгрия 40 жылдан ашуун убакыттан кийин шаршемби күнү алгачкы астронавттарын Эл аралык космос станциясына (ЭКС) атайын учуруу менен жөнөтүштү.
SpaceX компаниясынын Falcon ракетасы НАСАнын Кеннеди космос борборунан эки жума кечигүү менен учурулду. Кечигүү эл аралык космос станциясындагы агып чыгуу маселелерине байланыштуу болгон.
SpaceX маалыматына ылайык, экипаж ЭКСга миссиясы учурунда 60тан ашуун илимий жана технологиялык эксперименттерди жүргүзөт. Алар адам изилдөөлөрүнө, Жерди байкоого, биологиялык изилдөөлөргө жана материалдык илимдерге басым жасашат.
Бул миссиянын чыгымдарын үч өлкө биргелешип көтөрүштү. Хьюстон шаарындагы Axiom Space компаниясы бул сапардын баасын ар бир киши үчүн 65 миллион доллардан ашык деп баалады.
НАСА экипаждын ЭКСке бейшемби күнү жетерин пландагандарын X платформасындагы билдирүүсүндө жарыялады.
Техникалык көйгөйлөр жана аба ырайынын жагымсыз шарттары миссиянын кечигүүсүнө себеп болгон. Бул миссия Индия үчүн чоң жетишкендик болуп саналат, анткени топтун капитаны Шубханшу Шукла эл аралык космос станциясына барган биринчи индиялык болот.
Индиянын премьер-министри Нарендра Моди X платформасындагы билдирүүсүндө миссияга канааттануусун билдирип, "Топтун капитаны Шукла Эл аралык космос станциясына барган биринчи индиялык болуу жолунда" деди.
Миссияны НАСАнын мурдагы астронавты жана азыркы Axiom Space директору Пегги Уитсон башкарат. Миссиянын эксперттери болсо - Европа космостук агенттигинин долбоорлор боюнча астронавты польшалык Славосз Узнански-Висневски жана венгриялык Тибор Капу.
