Бириккен Улуттар Уюмунун Палестиналык Качкындар боюнча агенттиги (UNRWA) Израилдин палестиналыктарды Газадан түштүктөгү Рафах шаарына күч менен көчүрүү планын айыптады жана бул кадам “ири концлагерлерди” жаратып, гуманитардык кризисти ого бетер курчутат деп билдирди.
UNRWAнын байланыш директору Джульетта Тоума Al Jazeera English агенттигине берген маегинде агенттик "кандайдыр бир калкты мажбурлап көчүрүүгө таптакыр каршы" экенин айтып: "Эгер мындай боло турган болсо, анда азыркы согуш учурунда жана мурда бир нече жолу жер которгон он миңдеген адамдарды түштүккө жана ал жактан белгисиз тарапка түртөт. Азыр жасалышы керек болгон нерсе – ок атышууну токтотууга жетишүү жана UNRWAга өтө зарыл болгон жардамдарды жеткирүүгө мүмкүнчүлүк берүү" деди.
Тоуманын айтымында, UNRWAнын Египет жана Иорданияда 6,000ден ашуун жүк ташуучу унааларында мөөнөтү бүтүп бара жаткан дары-дармектер, бузулуп бара жаткан азык-түлүктөр жана гигиеналык каражаттар бар.
“Биз каалаган нерсе – курчоону алып салгыла, ок атышууну токтоткула, UNRWA жана башка БУУнун мекемелерине өз иштерин аткарууга мүмкүнчүлүк бергиле,” - деди.
“Гуманитардык шаар”
БУУ буга чейин Газадагы массалык жер которуулар тууралуу коңгуроо кагып, март айында ок атышпоо келишими аяктагандан бери 700 миңден ашуун адам жер которгондугун билдирген.
Израилдин коргоо министри Исраэл Кац армияга Газанын түштүгүндөгү Рафахтын урандыларынын үстүнө “гуманитардык шаар” куруп бардык палестиналыктарды ал жерге көчүрүү планын даярдоого буйрук бергенин айтты.
Ок атышпоо боюнча эл аралык чакырыктарды четке каккан Израиль армиясы 2023-жылдын 7-октябрынан бери Газага ырайымсыз чабуул жасап, 57 миң 800дөй палестиналыкты, көбү аялдар жана балдарды өлтүрдү. Үзгүлтүксүз бомбалоо аймакты кыйратып, тамак-аштын жетишсиздигине жана оорулардын жайылышына алып келди.
Өткөн жылдын ноябрында Эл аралык кылмыш соту Израилдин премьер-министри Биньямин Нетаньяхуга жана анын мурдагы коргоо министри Йоав Галлантка Газадагы согуш кылмыштары жана адамзатка каршы кылмыштар боюнча камакка алуу ордерлерин чыгарган.
Ошондой эле Израиль Газадагы согушу үчүн Эл аралык адилет сотунда геноцид доосу менен бет-бет турат.
