Вьетнамдын тышкы иштер министри көз карандысыз Палестина мамлекетине колдоосун кайталады
Вьетнамдын тышкы иштер министри Ле Хоай Трунг Газаны калыбына келтирүүгө көмөктөшүүгө даяр экенин билдирип, эл аралык укуктун алкагында эки мамлекеттүү чечимди колдой турганын айтты.
Жергиликтүү вьетнамдык маалымат каражаттары өкмөт 1967-жылга чейинки чек араларга негизделген көз карандысыз Палестина мамлекетин түзүү сыяктуу эки мамлекеттүү чечимди колдой турганын кайталаганын билдиришти.
Вьетнамдын англис тилиндеги Voice of Vietnam жаңылыктар сайты бейшемби күнү жарыялаган кабарда, бул билдирүүнү Вьетнамдын жогорку даражалуу дипломаты Ле Хоай Трунг шаршемби күнү Ханойго биринчи чет өлкөлүк сапары менен барган палестиналык кесиптеши Варсен Агабекян Шахин менен жолугушуу учурунда айтты.
Трунг согуштан кыйраган Газаны калыбына келтирүү процессине катышууга даяр экендиктерин маалымдады.
Ошондой эле Вьетнамдын эл аралык укукка жана БУУнун тиешелүү резолюцияларына негизделген, 1967-жылга чейинки чек аралары менен борбору Чыгыш Иерусалим болгон көз карандысыз Палестина мамлекетин түзүү сыяктуу эки мамлекеттүү чечимди колдой тургандыгын баса белгиледи.
Вьетнамдын тышкы иштер министри: "Вьетнам палестиналыктардын көз карандысыздык жана өз тагдырын өзү аныктоо үчүн адилеттүү күрөшүн ар дайым колдоп келген", - деди.
Шахин болсо Ханойго палестиналыктардын "адилеттүү" күрөшүнө көрсөткөн колдоосу үчүн ыраазычылык билдирди.
Вьетнам менен Палестинанын улуттук көз карандысыздыкка болгон бирдей умтулуулары бар экенине басым жасаган Шахин Вьетнам келечекте Палестинаны колдоону улантып, жаңжалды токтотууга салым кошот деген үмүтүн билдирди.
Эки министр ошондой эле Вьетнам менен Палестинанын ортосундагы кызматташтыкты өнүктүрүү боюнча конкреттүү чаралар, анын ичинде жогорку деңгээлдеги делегациялардын өз ара сапарларын көбөйтүү, экономикалык кызматташтыкты жакшыртуу, билим берүү жана эл аралык мамилелер жаатындагы кызматташтыкты кеңейтүү боюнча макулдашышты.
Трунг менен Шахин эки өлкөдө дипломатиялык паспорттору бар адамдар үчүн визасыз режим жөнүндө келишимге да кол коюшту.