Франциянын юстиция министри Жеральд Дарманен дем алыш күндөрү «сары жилеттүүлөрдүн» нааразычылык акциялары учурунда зордук-зомбулук катталган өлкөнүн түндүгүндөгү Лилль шаарына барды.
Дарманен ал жерде берген билдирүүсүндө нааразычылык акциялары учурундагы зордук-зомбулукка сот системасынын реакциясына канааттанганын айтты.
Министр нааразычылык акциялары маалында вандализмге жана талап-тоноочулукка шектелген 149 адамдын кармалганын билдирди.
Ошол эле учурда, улуттук басма сөздүн маалыматына караганда, дем алыш күндөрү Парижде кымбатчылыкка каршы нааразычылык акциялары учурунда каза болгон эки адамдын өлүмү боюнча тергөө башталды.
Париж полиция департаментинин билдирүүсүнө ылайык, 17-октябрда Париждеги Республика аянтынын жанынан 59 жаштагы эркек киши эс-учун жоготкон абалда табылган. Медициналык жардам көрсөтүлгөнүнө карабастан, ал биринчи жардам көрсөтүү борборунда каза болгон.
Ошондой эле 19-октябрда эртең менен Париждеги Бергер көчөсүнөн нааразычылык акциялары учурунда өзүн жаман сезген 48 жаштагы эркек кишинин сөөгү табылган.
Франциядагы нааразычылык акциялары
Студенттер колдогон «Сары жилеттер» кыймылы 17-октябрда кымбатчылыктын өсүшүнө жана күйүүчү майдын кымбатташына каршы бүткүл өлкө боюнча нааразычылык акцияларын уюштурду.
Акциялар учурунда болжол менен 2 500 адам кармалып, 1 000ден ашык полиция кызматкери, жандармерия жана өрт өчүрүүчү жаракат алды.
Зомбулук менен коштолгон нааразычылык акцияларынын жүрүшүндө 3 000ге жакын ишкана жабыркап же тонолду.
Лион жана Лимож шаарларында мэриянын имараттары жана туризм кеңсеси өрттөлсө, Марселде нааразычылык акциясынын катышуучулары мэриянын имаратына зыян келтиришти.
Акциялардан жабыркаган ишканалар өкмөттү кризисти жөнгө сала албаганы үчүн сынга алышты.
18-октябрда Парижде жүздөгөн демонстрант кайрадан көчөгө чыгышты.
Мындан аркы башаламандыктардын алдын алуу максатында жергиликтүү бийлик Париж, Лилль, Лион, Ницца жана Марсель сыяктуу шаарлардын айрым аймактарында жарым-жартылай коменданттык саат киргизүүнү чечти.
