Бир расмий өкүлдүн айтымында, Пакистандын түндүк-батышындагы Хайбер-Пахтунхва провинциясында болгон террордук кол салууда, кеминде беш полиция кызматкери жана эки жааран каза болду.
Ички иштер министри Мохсин Накви шейшемби күнү жасаган билдирүүсүндө, Хайбер-Пахтунхванын Кохат районунда куралдуу кол салуучулар полиция унаасына сокку урганын белгиледи. Ал кол салуу учурунда полициянын комиссарынын жардамчысы (DSP) Асад Мехмуд жана төрт полиция кызматкеринин каза болгонун кошумчалады.
Кохат районунун коопсуздук боюнча башчысы Шехбаз Элахи билдирүүсүндө, чабуулда эки жаран да каза болуп, үч адамдын жаракат алганын билдирди.
Өткөн жумада Хайбер-Пахтунхванын түндүк-батышында жана Белужистандын түштүк-батышында террорчулар менен болгон кагылышууларда жана коопсуздук операцияларында, арасында армиянын жогорку даражалуу офицери да болгон кеминде 16 коопсуздук кызматкери каза болгон.
Армиянын маалыматына караганда, бул операциялар жана кагылышуулар учурунда террорчулукка шектелген 53 адам жок кылынган.
Акыркы жылдары Пакистанда, өзгөчө Хайбер-Пахтунхва жана Белужистан аймактарында коопсуздук күчтөрүн, укук коргоо органдарын жана мамлекеттик мекемелерди бутага алган жардыруулар жана кол салуулар көбөйүп, террордук окуялардын өсүшү байкалууда.
