Иран менен АКШнын ортосундагы сүйлөшүүлөрдө ортомчу болгон Пакистандын ички иштер министри Мохсен Рыза Накви Тегеранда президент Масуд Пезешкиан менен жолугушту.
Иран Президенттигинин жазуу түрүндөгү билдирүүсүнө ылайык, Тегеранга барган Накви Пезешкиан тарабынан кабыл алынды.
Жолугушууда Иран менен Пакистандын ортосундагы "артыкчылыктуу мамилелерди жана терең байланыштарды" баса белгилеген Пезешкиан Иран эки өлкөнүн ортосундагы мамилелерди тереңдетүүгө жана саясий, экономикалык, соода, маданий жана коопсуздук тармактарындагы кызматташтыкты кеңейтүүгө даяр экенин билдирди.
Иран президенти Пезешкиан эки тараптуу кызматташтыктын деңгээлин жогорулатуу үчүн учурдагы мүмкүнчүлүктөрдү пайдалануу зарылдыгын баса белгилеп:
"Иран Пакистан менен өз ара кызыкчылык жараткан бардык тармактарда мамилелерин андан ары тереңдетүүгө жана биргелешкен кызматташтыкты бекемдөөгө жол ачууга даяр. Эки тараптуу мамилелерди өнүктүрүү жана кызматташтыкты тереңдетүү эки өлкөнүн өз ара кызыкчылыктарын камсыз кылууга, ошондой эле аймактык туруктуулукту жана коопсуздукту чыңдоого жардам берет", - деди.
Пакистандын ички иштер министри Накви болсо Тегеранга сапарынын максаты Ирандын ички иштер министри Искандар Мумининин Пакистанга жакында болгон сапарында жетишилген келишимдерди жана түшүнүшүүлөрдү улантуу экенин билдирди.
Эки өлкөнүн ортосундагы "бекем жана байыркы байланыштарга" басым жасаган пакистандык министр: "Иран менен Пакистандын ортосундагы мамилелер бекем жана бузулгус, ал эми Исламабад Иран менен мамилелерди ар тараптуу өнүктүрүүнү олуттуу чечкиндүүлүк жана эрк менен улантууда" деди.
