Түркиянын президенти Режеп Таййип Эрдоган дүйшөмбү күнү Израиль-Иран чатагын токтотуу үчүн дипломатиялык аракеттерди күчөтүп, Ирандын президенти Масуд Пезешкиан жана Орусиянын президенти Владимир Путин менен телефон аркылуу сүйлөшүү өткөрдү.
Эрдоган Түркиянын чыңалууну басаңдатууга даяр экенин кайталады. Ал бардык тараптарды диалогго жана дипломатияга кайтууга чакырып, кеңири аймактык согуштун коркунучуна көңүл бурду.
Эрдоган ирандык кесиптеши Масуд Пезешкиан менен телефон аркылуу сүйлөшүүсүндө Израиль менен Ирандын ортосундагы чыңалууну талкуулады. Анын айтымында, Түркия жаңжалды азайтуу жана өзөктүк сүйлөшүүлөргө кайтып келүүнү колдоо үчүн көмөкчү ролду ойноого даяр. Түркия Республикасынын Презденттигинин Коммуникация башкармалыгы Эрдогандын аймакта тынчтык жана ырааттуулуктун сакталышына чоң маани бергенин баса белгиледи.
Путин менен телефон аркылуу сүйлөшүү
Эрдоган Путин менен телефон аркылуу сүйлөшүү өткөрүп, Израиль-Иран чатагы жана кеңири аймактык маселелерди талкуулады.
Президент Эрдоган Израилдин Иранга кол салууларынан улам келип чыккан зордук-зомбулук циклинин бүткүл аймактын коопсуздугуна коркунуч туудурганын белгилеп, Израилдин эл аралык укукту тоготпогондугун глобалдык көз караштан алганда олуттуу бир коркунуч катары баалады.
Эрдоган дипломатиянын шашылыш муктаждык экенин баса белгилеп, аймактын жаңы согушту көтөрө албасын баса белгиледи. Түркиянын активдүү дипломатиялык аракеттерине көңүл бурган Эрдоган, Иранга байланыштуу маселелердин чечилиши диалогду талап кылаарын жана бардык тараптардын тез арада сүйлөшүү үстөлүнө кайтуулары керектигин айтты.
Эрдоган ошондой эле акыркы кол салуулардын Газадагы гуманитардык кризистен көңүлдөрдү алаксытууга жол берилбеши керектигин эскертип, Израилдин жерде кайра кайтарылгыс абалдарды жаратууга аракет кылышы мүмкүн экенине көңүлдөрдү бурду.
Президент Путин Эрдогандын тынчсызданууларына макул экенин билдирип, тез арада ок атышпоо жана дипломатиялык чечимдер үчүн мейкиндик түзүлүшү керектиги тууралуу макулдашканын айтты.
Аймакта чыңалуунун күчөшү
Израиль жума күнү Ирандагы бир катар буталарга, анын ичинде аскердик жана өзөктүк объектилерге координацияланган аба соккуларын баштагандан кийин аймактык чыңалуу күчөдү. Тегеран жооптук чабуулдарын баштады.
Израилдин бийликтери жума күндөн бери Ирандын ракеталык соккуларынан кеминде 24 адам набыт болуп, жүздөгөн киши жарадар болгонун айтса, Иран Израилдин соккуларынан кеминде 224 киши каза таап, 1000ден ашууну жараат алганын билдирди.
