Түркия Республикасынын Президенти Режеп Таййип Эрдоган жакын аймакта уланып жаткан кризистердин “Түрк дүйнөсүнүн тилектештик ичинде аракет кылышынын стратегиялык баалуулуктарын дагы бир жолу ортого салганын” айтты.

Жума күнү Казакстандын Түркстан шаарында өткөн Түрк мамлекеттер уюмунун (ТМУ) расмий эмес саммитинде сөз сүйлөгөн президент Эрдоган: "Палестина, Ливан, Иран, Украина жана башка көптөгөн кризистер биздин коргонуубузду күчтөндүрүү жана өнөр жай тармагында кызматташуубузду арттыруу зарылдыгын көрсөтүүдө", - деди.

Эрдоган Түркиянын кийинки төрагалык мөөнөтүндө Түрк мамлекеттер уюмунун алкагында киберкоопсуздук тармагында координацияны жана кызматташтыкты мындан ары өнүктүрүүнү максат кылганын айтып, киберкоопсуздуктун бүгүнкү дүйнөдө кургактыктагы, абадагы жана деңиздеги коопсуздук сыяктуу маанилүү жана зарыл экенин кошумчалады.

Эрдоган өзгөчө түрк дүйнөсүнүн Түндүк Кипр Түрк Республикасы менен саясий, экономикалык жана маданий карым - катнаштарын чыңдоону улантат деген үмүтүн билдирип, маданий жана санариптик кызматташтыкты баса белгилеп, билим берүү жана маданияттан баштап академиялык кызматташтыкка жана санариптик трансформацияга чейинки кеңири тармактарда жалпы түрк алфавитин колдонуунун маанилүү экенин айтты.

Эрдоган бул тууралуу: "Биз санариптик дүйнөдө жалпы тилибиздин байлыгын көрсөтө турган түрк тили модели жана ушуга окшогон жасалма интеллектке негизделген демилгелердин колдоого алынышы керектигине ишенебиз", - деди.