Судандын борбордук аймагында жайгашкан Түндүк Кордофанда парамилитардык Ыкчам колдоо күчтөрү (ЫКК) тарабынан жасалган дрон чабуулунан кеминде 40 адам каза болду.
Түндүк Кордофандын гуманитардык иштер боюнча комиссарынын айтымында, кол салуу провинциянын борбору Эл-Убейддин чыгышындагы Аль Лувейб айылында жайкын тургундарды бутага алды. Бул тууралуу дүйшөмбү күнү Al Jazeera телеканалына билдирди.
Аймактын өкмөтү буга чейин кол салуудан ондогон жайкын тургундар, анын ичинде балдар жана аялдар каза болуп жаракат алганын кабарлаган. Чабуул айылдагы аза күтүү чатырын бутага алган.
Мамлекеттик бийлик бул кол салууну “жайкын тургундарга каршы ЫКК тарабынан жасалган кайталанган зомбулуктардын жаңы кылмышы” деп мүнөздөп, жабыркагандардын арасында аялдар, балдар жана кары-картаңдар бар экенин белгиледи, бирок так санын айткан жок.
Аймактын өкмөтү эл аралык коомчулукту Ыкчам колдоо күчтөрүн “террордук уюм” деп дароо таанууга чакырып, уюмду “куралсыз жайкын тургундарга каршы этникалык жана расалык негизде кылмыштарды жасоодо” деп айыптады.
Эл аралык миграция уюмунун (IOM) маалыматына караганда, октябрь айынын аягынан бери аймактагы коопсуздуктун начарлашынан улам Түндүк жана Түштүк Кордофандан 38 миңден ашуун адам качып кетти.
Ыкчам колдоо күчтөрү Судан армиясы менен уланып жаткан согуштун алкагында Түндүк Кордофандын Бара шаарын өз көзөмөлүнө алып, бирок жайкын тургундарды бутага алууну четке кагууда.
26-октябрда ЫКК Түндүк Дарфур штатынын борбору Эль Фашир шаарын басып алып, жергиликтүү жана эл аралык уюмдардын маалыматы боюнча, жайкын тургундарга каршы массалык кыргындарды жасаган. Бул чабуул Судандын географиялык бөлүнүүсүн күчөтүшү мүмкүн деген эскертүүлөр айтылууда.
Суданда аймактык жана эл аралык ортомчулук аракеттерине карабастан 2023-жылдын 15-апрелинен бери согуш уланып келе жатат.
