Түркия Газага гуманитардык жардам жеткирүүгө аракет кылган флотилияга карата Израилдин кийлигишүүсүн каракчылык жана эл аралык мыйзамдарды бузуу катары сыпаттады.

Түркиянын Тышкы иштер министрлиги шаршемби күнү билдирүү жасап, түрк жарандары жана эл өкүлдөрү катышкан Эркиндик флотилиясына каршы жасалган бул кийлигишүү "геноцидчи" Израиль өкмөтүнүн бардык тынчтыкчыл демилгелерди бутага алып, аймактагы чыңалууну күчөткөнүн жана тынчтык аракеттерине зыян келтиргенин көрсөттү деп белгиледи.

Анкара түрк жарандарын бошотуу үчүн бардык аракеттер көрүлүп жатканын билдирди. Тышкы иштер министрлиги башка өлкөлөрдүн жарандары боюнча да координация жүргүзүлүп жатканын кошумчалады.

Израиль Газага азык-түлүк жана дары-дармек сыяктуу бардык жардамдарды киргизүүгө бөгөт койгон. Дүйнө жүзүндөгү укук коргоо уюмдары жана өкмөттөр мунун ачарчылыкка алып келгенин айтышууда.

Флотилия Израилдин блокадасын бузууга аракет кылып, Тель-Авивдин геноциддик саясатына каршы нааразылыктын символу катары жүктөрдү Израиль портторунда түшүрүүдөн баш тартууда.