Түркиянын Коммуникация башкармалыгынын башчысы Фахреттин Алтун Израилдин акыркы аракеттерин, айрыкча медиа кызматкерлерине багытталган чабуулдарын катуу айыптап, бул аракеттерди "жапайычылык" жана "басма сөз эркиндигине каршы жийиркеничтүү кол салуу" деп сыпаттады.
Дүйшөмбү күнкү билдирүүсүндө Алтун, Израилдин Ирандын мамлекеттик телеканалына жасаган соккусун айыптап, анда журналисттер жана жайкын тургундардын каза тапканын белгиледи.
Фахреттин Алтун X платформасындагы билдирүүсүндө : «Израиль басма сөз өкүлдөрүн жана жарандарды бутага алып Ирандын мамлекеттик телеканалына кол салуусу ачыктан-ачык кыргын болуп саналат. Журналисттерге жана медиа өкүлдөрүнө кол салуу жапайычылык»,- деди.
Алтун каза болгон ирандык журналисттер үчүн көңүл айтып, Израиль өкмөтүн эл аралык нормаларды көп жолу бузганы үчүн мамлекеттүүлүгүн жоготту деп айыптады.
"Биз эл аралык коомчулукту Израилдин агрессиясына жана аймакты отко салган жоопкерсиз аракеттерине каршы чара көрүүгө чакырабыз," – деп кошумчалады.
‘Мыйзамсыз аракеттер’
Башка бир билдирүүсүндө Алтун Израиль полициясынын Хайфа шаарында ТРТ Араби кабарчысы Фехми Штеве жана анын командасынын түз эфирин үзгүлтүккө учуратканын да айыптады. Команданын жабдуулары конфискацияланганын жана TRT Arabi менен Египеттин Alghad TV телеканалдарынын журналисттери зомбулукка кабылганын билдирди.
"Израиль өкмөтү тилекке каршы жасалган кыргындарды бүтүндөй адамзатка жеткирүүгө аракет кылган журналисттерге каршы мыйзамсыз аракеттерин улантууда," – деген Алтун "Бул акылсыздыктын акыркы көрүнүшү" деп айтты.
Батыштын унчукпай турганын да сынга алган Алтун, демократиялык баалуулуктарды жактаган эл аралык мекемелердин реакциясы жок экенине басым жасады. Алтун: «Кылмышкер Израиль болгондо эч кандай нормаларга жана баалуулуктарга маани бербеген жана алардын баарын көрмөксөнгө салган Батыш жана анын «демократиялык» мекемелери бул жана ушул сыяктуу мыйзам бузууларга унчукпай калабы, муну дүйнөлүк коомдук пикирдин баамдоосуна калтырабыз»,-деди.
Алтун Түркиянын басма сөз эркиндигин жана медиа кызматкерлеринин укуктарын коргоодогу чечкиндүүлүгүн дагы бир жолу баса белгилеп: "Биз сөз эркиндигин, маалымат алуу эркиндигин жана медиа кызматкерлеринин укуктарын коргоо боюнча чечкиндүү тарапта болууну улантабыз" деп кошумчалады.
