Индия полициясы өлкөнүн түштүгүндө жүргүнчү ташыган автобус мотоцикл менен кагышкандан кийин өрттөнүп кетип, кеминде 25 адамдын каза болгонун жана бир нече адамдын жаракат алганын билдирди.
Полициянын жогорку кызматкери Викрант Патил жума күнү эртең менен Андхра-Прадеш штатындагы Курнул районунун жанындагы трассада катуу ылдамдыкта бара жаткан автобусту өрт каптап, жүргүнчүлөр чыга албай калганын айтты.
Патилдин айтымында, айрым жүргүнчүлөр терезелерди сындырып жана автобустан секирип жеңил жаракаттар менен качып кутулушту, бирок калгандары жардам келгенге чейин өрттөн каза болушту.
44 жүргүнчүсү бар автобус Телангана штатындагы Хайдарабад менен Карнатака штатындагы Бенгалуру шаарларынын ортосунда бара жаткан.
Кырсык Хайдарабаддан 210 чакырым түштүктө жайгашкан Курнулга жакын Чиннатекуру айылында катталды.
Патил мотоциклдин катуу ылдамдыкта бара жаткан автобустун артына урунуп, тыгылып калганын билдирди. Бир аз сүйрөлгөндөн кийин учкундар автобустун күйүүчү май багын тутандырган.
“Түтүн чыга баштаганда айдоочу автобусту токтотуп, өрт өчүргүч менен өрттү өчүрүүгө аракет кылган, бирок өрт өтө катуу болгондуктан аны көзөмөлдөй алган эмес,” - деди Патил.
Кырсык учурунда жүргүнчүлөрдүн көпчүлүгү уктап жатышканын, автобус толугу менен күйүп кеткенин жана мотоциклчинин да каза болгонун кошумчалады.
Кырсыкты иликтөө үчүн соттук-медициналык эксперттердин тобу иштеп жатат.
Индиянын премьер-министри Нарендра Моди жана Андхра-Прадеш штатынын башчысы Н. Чандрабабу Найду каза болгондордун үй-бүлөлөрүнө көңүл айтышты.
Бул Индияда эки жуманын ичинде болгон экинчи ири автобус кырсыгы. Буга чейин ушул айдын башында Ражастан штатында жүргүнчү ташыган автобуста электр зымдарынын кыска туташуусунан өрт чыгып, кеминде 20 адам каза тапкан.
