Украинанын президенти Владимир Зеленский Орусия сунуштаган дүйшөмбү күнү Стамбулда өтө турган жолугушууга Украина катыша турганын билдирди.
«Мен (Украинанын) позицияларын дүйшөмбү күнү Стамбулдагы жолугушуунун алдында айттым», - деди Зеленский Telegram баракчасында кызматкерлери менен жолугушуудан кийин.
Зеленский Украинанын делегациясын дагы бир жолу коргоо министри Рустем Умеров жетектей турганын кошумчалады.
472 учкучсуз учуучу аппарат Украинага сокку урду
Башка маалыматка караганда, Орусия ишембиге караган түнү Украинага 472 учкучсуз учуучу аппарат менен сокку урду. Украин аба күчтөрү бул согуштагы эң күчтүү түнкү сокку болгонун билдирди.
Украинанын Аба күчтөрү Орусия андан тышкары жети ракета учурганын билдирди.
Билдирүүдө 382 учкучсуз учуучу аппарат менен үч ракетанын атып түшүрүлгөнү же таасирсиз абалга келтирилгени белгиленди.
Орусия соңку кездери Украинага түнкү кезектеги сокку урууда учкучсуз учуучу аппараттардын санын көбөйттү.
Орусиянын өзөктүк бомбалоочу учактарына кол салуу
Украина жекшемби күнү Орусиянын Сибирдеги аскердик базасындагы алыскы аралыкка учуучу өзөктүк бомбалоочу учактарына кол салды. Фронт сызыгынан 4300 км (2670 миль) аралыкта жасалган сокку Украинанын эң узак аралыктагы соккусу болду.
Социалдык тармактарда бөлүшүлгөн тастыкталбаган видео жана сүрөттөрдө Орусиянын стратегиялык бомбалоочу учактары Иркутсктин түндүгүндөгү Белая авиабазасында жалынга чөмүлгөн.
Украинанын баш калаасы Киевдеги аты-жөнүн атабоону суранган украиналык булак Reuters агенттигине атып түшүрүлгөн учактын арасында Орусия Украинага алыс аралыкка атуучу ракеталарды атуу үчүн колдонгон Ту-95 жана Ту-22 стратегиялык бомбалоочу учактары болгонун айтты.
Орус тараптан Иркутск губернатору Игорь Кобзев Усольский районундагы Средный айылына жакын жердеги аскер бөлүгүнө учкучсуз учуучу аппарат менен чабуул жасалганын айтып, бирок стратегиялык авиация тууралуу сөз кылган жок.
Кобзев Telegram аркылуу бөлүшкөн видеодо учкучсуз учуучу аппараттар абада учуп, асманга чоң түтүн чыгып жатканын көрүүгө болот.
Кобзев мунун Сибирдин ал бөлүгүндө жасалган биринчи кол салуу болгонун айтып, кол салууга канча учкучсуз учуучу аппарат катышканы белгисиз экенин, учкучсуз учуучу аппараттар жүк ташуучу унаадан көтөрүлгөнүн айтты.
