Ливан Иран элчисинин аккредитациясын жокко чыгарып, аны "персона нон грата" деп жарыялады.
Ливандын Тышкы иштер министрлигинин билдирүүсүндө, Ирандын элчиси Мохаммад Реза Шибани 29-мартка чейин өлкөдөн чыгып кетиши керектиги жарыяланды.
Министрлик ошондой эле Ливандын Ирандагы элчиси Ахмад Суэйдандын да кеңешүүлөр үчүн чакыртылып алынганын кабарлады.
Министрлик бул чечим "Тегерандын эки өлкөнүн ортосундагы дипломатиялык нормаларды жана протоколдорду бузгандыгынан" улам ишке ашырылганын билдирди.
5-мартта Ливан өкмөтү өлкөдө иштеп жаткан Ирандын Революциялык гвардия корпусунун (ИРГК) мүчөлөрүн издөөгө жана камакка алууга буйрук берген.
Президент Жозеф Аун өткөн жылы Иранга Ливандын ичиндеги бир дагы топко курал алып жүрүүгө же чет элдик колдоого таянууга уруксат берилбей турганын билдирген.
Израиль 2-марттан бери Ливанды абадан бомбалап, Ливандын түштүгүнө кургактагы операция баштаган.
Ливан бийлигинин маалыматына караганда, Израилдин чабуулдарынан ушул убакка чейин кеминде 1039 адам каза таап, 2876 адам жаракат алды.
Учурдагы чыңалуу 28-февралдан бери 1340тан ашык адамдын өмүрүн алган АКШ менен Израилдин биргелешкен чабуулу учурунда болду.
Тегеран Израилге, ошондой эле Иорданияга, Иракка жана Перс булуңундагы мамлекеттерге каршы дрон жана ракеталык чабуулдар менен жооп кайтарып, "АКШнын аскердик активдерин" бутага алып жатканын билдирди.
