Канададагы Ванкувер шаарында көчө фестивалында унаа элди сүзүп кеткенден кийин, кеминде тогуз адам каза болгонун полиция тастыктады.

Ванкувер полициясы билдирүүсүндө: “Азыркы учурда, кечээ түнкү Лапу Лапу фестивалында бир киши унаасы менен элди сүзгөндөн кийин тогуз адам каза болгонун тастыктай алабыз”, – деп айтты.

Буга чейин полиция бир нече адам каза болуп, дагы бир нече киши жаракат алганын, окуя E. 41-авеню менен Фрейзер көчөсүндө болгонун жана унаанын айдоочусу кармалганын билдирген.

Премьер-министр Марк Карни социалдык медиа платформасы X аркылуу бул “коркунучтуу окуялар” тууралуу кабарды угуп, “терең кайгыга батканын” билдирди.

“Каза болгондордун жана жаракат алгандардын жакындарына, Филиппин-Канадалык коомчулугуна жана Ванкувердеги бардык адамдарга терең кайгыруу менен көңүл айтам. Биз баарыңар менен бирге кайгырып жатабыз”, – деди ал.

Окуя Лапу Лапу күнү Блок Партиясында болгон, бул Филиппиндин биринчи улуттук баатырына арналган жыл сайын өткөрүлүүчү майрам.

Ванкувер Кингсвей округунун парламент мүчөсү Дон Дэвис X платформасында: “Лапу Лапу фестивалындагы коркунучтуу сүзүп кетүү тууралуу кайгылуу кабарды угуп, бардык жабыркагандар жана алардын үй-бүлөлөрү үчүн дуба кылып жатам”, – деп жазды.

Британ Колумбиясынын премьер-министри Дэвид Эби бул кабарды угуп, “үрөйү учуп, жүрөгү сыздаганын” айтты, ал эми шаар мэри Кен Сим: “Биздин ойлорубуз бул оор учурда жабыркагандар жана Ванкувердеги Филиппин коомчулугу менен бирге”, – деп билдирди.