Грузиянын премьер-министри Ираклий Кобахидзе жекшемби күнү президенттик сарайга кирүүгө аракет кылган демонстранттарды өкмөттү кулатууга аракет кылган деп айыптап, Европа Биримдигин Грузиянын саясатына кийлигишип жатат деп күнөөлөдү.
Грузиянын полициясы ишемби күнү президенттик сарайдын жанындагы демонстранттарды таратуу үчүн калемпир спрейин жана суу аткычтарды колдонуп, беш активистти кармады. Бул окуя жергиликтүү шайлоолор өткөн күнү оппозициянын чоң митинг өткөргөн учурунда болду.
Кобахидзе митингге 7 миңге жакын адам катышканын, бирок алардын "конституциялык түзүлүштү кулатуу аракети" ийгиликсиз болгонун айтты. Ал бул аракетке Европа Биримдиги колдоо көрсөткөнүн белгиледи.
Грузиянын Интерпресс маалымат агенттигине караганда премьер-министр:"Алар чара көрүштү, төңкөрүш жасоого аракет кылышты, алар ишке ашпай калды жана анан алар кырдаалдан алыстай башташты", - деди.
Премьер-министр Кобахидзе:"Эч ким жоопкерчиликтен качып кутула албайт. Бул саясий жоопкерчиликти да камтыйт”,-деди.
Ал Европа Биримдигинин элчиси Павел Герчинскийди Грузиянын саясатына кийлигишип жатат деп айыптап, аны нааразылык акцияларын айыптоого чакырды.
"Сиздер билесиздер, чет өлкөдөн айрым адамдар бул аракеттерге, конституциялык түзүлүштү кулатуу аракети деп жарыяланган нерсеге түздөн-түз колдоо көрсөтүштү," – деди Кобахидзе.
"Бул контекстте Грузиядагы Европа Биримдигинин элчиси өзгөчө жоопкерчиликке ээ. Ал чыгып, бул окуялардан алыстап, Тбилисинин көчөлөрүндө болуп жаткан нерселерди катуу айыпташы керек."
Европа Биримдиги бул дооматтар боюнча дароо комментарий берген жок, бирок июль айында Европа Биримдигинин дипломатиялык кызматы Грузия бийлигинин Европа Биримдигинин Грузиядагы ролу тууралуу "жалган маалымат жана негизсиз айыптоолорун" четке каккан.
"Европа Биримдиги Грузияны туруксуздаштырууну, согушка тартууну же "салттуу эмес баалуулуктарды" таңуулоону көздөйт деген акыркы билдирүүлөр коомчулукту адаштыруу үчүн атайын жасалган аракет болуп саналат," – деп июль айында билдирген.
Ишемби күнү башкаруучу "Грузин кыялы" партиясы 3,7 миллион калкы бар Түштүк Кавказ өлкөсүндөгү бардык муниципалитеттерде шайлоодо жеңишке жетишкенин жарыялады. Бул шайлоого эки ири оппозициялык блоктор катышкан эмес.
