Украина президенти Владимир Зеленский Орусия Федерациясына караштуу Башкортостан Республикасынын борбору Уфадагы мунай иштетүүчү заводго кайрадан чабуул койгондорун жарыялады.
Социалдык медиа аккаунтундагы билдирүүсүндө Владимир Зеленский Орусиядагы бир нече буталарга кол салгандарын айтты.
Уфадагы мунай иштетүүчү заводго кайрадан чабуул койгондорун бөлүшкөн Зеленский, мунай иштетүүчү заводдун фронттон болжол менен 1300 чакырым алыстыкта жайгашканын билдирди.
Зеленский ошондой эле алар өлкөсүнөн дээрлик 600 чакырым алыстыкта жайгашкан Орусиянын Пенза облусундагы ракета компоненттерин чыгаруучу объектти да бутага алгандарын маалымдады.
Орусия тынчтыкты камсыз кылышы керектигин баса белгилеген Зеленский: "Орусия бул согушту токтотушу керек", - деди.
Зеленский Орусиядагы буталарга чабуулардын видеосун да бөлүштү.
Украина армиясы мурда Уфадагы мунай иштетүүчү заводго кол салган.
Ошол эле учурда, Украинанын Аскер-аба күчтөрүнүн командирлигинин жазуу түрүндөгү билдирүүсүнө ылайык, орус армиясы кечээ кечинде өлкөгө 2 ракета жана 153 куралдуу учкучсуз учуучу аппарат менен чабуул койду.
Билдирүүдө Украинанын Аскер-аба күчтөрү бир ракетаны жана 130 пилотсуз учуучу аппаратты зыянсыздандырганы кабарланды.
Украинанын Өзгөчө кырдаалдар боюнча мамлекеттик кызматынын социалдык медиадагы билдирүүсүндө, орусиялыктардын чабуулдарынын натыйжасында Днепропетровск аймагында бир адам каза болуп, үчөө жаракат алганы маалымдалды.
