Орусиянын абадан коргонуу күчтөрү Москва аймагында жана түштүктөгү Калуга менен Тула облустарында украиналык 13 дрондун чабуулун токтотушканын Коргоо министрлиги билдирди.
Москва шаарынын мэри Сергей Собянин шейшемби күнү Telegram аркылуу Москва тарапка бара жаткан үч дрондун атып түшүрүлгөнүн жазды. Ал окуя тууралуу кошумча маалымат берген жок.
Коргоо министрлиги, Украинанын эки учкучсуз аппараты Москва облусунун үстүнөн, жетөө Калугада жана төртөө Тула облусунда атып түшүрүлгөнүн билдирди.
Кээ бир орус маалымат каражаттары Орусиянын баш калаасынын чыгышындагы Ногинск шаарында атып түшүрүлгөн дрондордун калдыктары тартылган видеолорду бөлүшүштү.
Орусиянын авиация башкармалыгы шейшемби күнү кечинде Москванын Внуково жана Домодедово аэропортторунда каттамдарды токтотту.
Бул дрон чабуулу президент Владимир Путиндин Москвада бир нече дүйнө лидерлерин кабыл алып, нацисттик Германияны жеңгендигинин 80 жылдыгын белгилөөгө даярданып жаткан күндөрдө болду.
Мындан тышкары, Украина менен чектешкен Брянск облусунун губернатору шейшемби күнү украиналык дрондун чабуулунан улам бир аял каза болгонун, анын унаасы дрондун соккусуна кабылганын билдирди.
