Орусиянын Украинадагы бир нече аймактарга түн ичинде жасаган абадан соккуларында кеминде төрт адам каза болуп, 30дан ашуун адам жаракат алганын аймактык бийлик бүгүн эртең менен билдирди.
Украинанын мамлекеттик өзгөчө кырдаалдар кызматынын дүйшөмбү күнкү билдирүүсүнө караганда, эки адам чыгыштагы Сумы облусунда жана бир адам түштүк Одесса облусунда набыт болду. Жергиликтүү провинциялык булактар түштүктөгү Херсон облусунда төртүнчү эркек киши каза болгонун ырасташты.
Бул чабуулдардан 30дан ашуун адам жаракат алып, алардын көбү чыгыштагы Харьков жана Днепропетровск аймактарында катталды.
Киев мэринин Telegram аркылуу жарыялаган билдирүүсүндө, орус учкучсуз учуучу аппараттары борбор калаа Киевдеги бир нече имаратка кол салганы, бирок жабыркагандар болбогону айтылды.
Орусиянын дрондор боюнча билдирүүсү
Орусиянын коргоо министрлиги түн ичинде 91 украиналык дронго бөгөт коюлуп жок кылганын билдирди. Алардын сегизи Москва аймагында атып түшүрүлсө, калгандары Украина менен чектеш аймактарда таасиз кылынды.
Бул акыркы чабуулдар Орусиянын Украинага 2022-жылдын февраль айында башталган басып кирүүсүнөн берки эң ири дрон жана ракета чабуулунан бир нече күн өткөндөн кийин болду. Жума күнү орус күчтөрү Киевди бутага алган 530 дрондук жана онго жакын ракеталык чабуулдарды жасап, кеминде эки адамдын өмүрүн алды.
Эки өлкөнүн ортосундагы тирешүү уланып жатканда эки тарап тең барган сайын агрессивдүү аба соккуларын жасап жатышат.
