Бейшемби күнкү билдирүүсүндө министр Уралоглу “Зенгезур” коридору боюнча өз ара түшүнүшүү меморандумуна жетишилгенин жана долбоор төрт-беш жылдын ичинде ишке ашырылышы мүмкүн экенин, ушундайча Түрк дүйнөсү менен жогорку кубаттуулуктагы түз байланыш түзүлөрүн айтты.

24 TV каналына берген маегинде Уралоглу “Зенгезур” коридору чыгыш-батыш транспорттук байланыштарынан тышкары, кубаттуулукту жогорулата турган жол катары каралышы керектигин билдирди.

Министр пландаштырылган жол Түркиянын чыгышындагы Карстан башталып, Ыгдыр жана Дилужу аркылуу өтүп Азербайжандын Нахчыван аймагына жете турганын, болжол менен 43 чакырымдык Зангезур коридору аркылуу да Азербайжандын негизги бөлүгүнө туташаарын айтты.

Уралоглу Азербайжан тарабындагы иштер аяктап баратканын жана Зангезур коридору боюнча өз ара түшүнүшүү меморандумуна жетишилгенин, бирок курулуш иштери али баштала электигин маалымдады.

Министр: «Биз Түркия тарабында алдыдагы күндөрү, келээрки айларда иш-аракеттерди баштайбыз деп үмүттөнөбүз», - деди.

Уралоглу Нахчыван тарабында 180 чакырымдык бөлүк бар экенин, анын бир бөлүгү жакшыртылып бир бөлүгү жаңы курулаарын, ал эми Түркия тарабында 224 чакырымдык бөлүктө курулуш иштери башталып, иш-аракеттердин уланып жатканын кошумчалады.

Транспорт жана инфраструктура министри “Зенгезур” коридорун ишке ашыруу менен төрт-беш жылдын ичинде Түрк дүйнөсүнө жете турган жогорку кубаттуулуктагы жана түз коридор куруларын айтты.

“Зенгезур” коридору Түркияны Азербайжан менен жана андан ары Борбордук Азия менен түздөн-түз байланыштыра турган стратегиялык транспорттук жол катары каралууда.

Ошондой эле Кытай менен Европаны Борбордук Азия, Каспий деңизи, Түштүк Кавказ жана Түркия аркылуу байланыштырган соода жолу болгон кеңири Борбордук коридордун потенциалдуу маанилүү бөлүгү болуп эсептелет.

Эгерде курулуш аяктаса, Түркия менен Азербайжандын ортосунда Нахчыван аркылуу түз жол байланышын камсыз кылат жана Грузия аркылуу өтүүчү учурдагы каттамдардан тышкары аймактык транспорттук мүмкүнчүлүктөрдү кеңейтүүгө жардам берет.