Түркия АКШдан импорттолгон айрым товарларга, мисалы жеңил унаа жана мөмө жемиштерге карата киргизилген жооп кайтаруу тарифтерин алып салды. Бул кадам Түркиянын президенти Режеп Таййип Эрдоган менен АКШ президенти Дональд Трамптын ушул жумада өтө турган маанилүү жолугушуусунун алдында жасалды.
Анкара бул жумада алып салган тарифтердин көбү 2018-жылга таандык. Ошол учурда Трамп Түркиядан импорттолгон болот жана алюминий сыяктуу товарларга тарифти эки эсеге көбөйткөн эле.
Буга жооп катары Түркия да АКШдан импорттолгон айрым товарларга, өзгөчө жеңил унааларга, алкоголдук ичимдиктерге жана тамекиге тарифти эки эсеге көбөйткөн. Анкара бул кадамды түрк экономикасына багытталган “атайын чабуулдарга” жооп кайтаруу деп сыпаттаган.
Түркиянын АКШ товарларына карата тарифтерди азайтуу чечими, Анкара менен Вашингтондун ортосундагы мамиленин жакшырып баратканынын белгиси катары каралууда.
Трамп президент Эрдогандын АКШга сапары учурунда «соода жана аскердик келишимдерди» түзүүнү күткөнүн айтты.
Трамп башкаруучулугу тарифтерди Орусия сыяктуу атаандаштарына гана эмес, Индия жана Канада сыяктуу союздаштарына да экономикалык курал катары колдонду. Бул кадам соода дефицитин азайтуу, жумуш орундарын түзүү жана глобалдык камсыздоо чынжырларын өз пайдасына өзгөртүү максатында жасалды.
Өткөн айда АКШ Түркиядан импорттолгон товарларга 15 пайыздык тариф киргизерин жарыялаган. Жооп катары Анкара АКШдан импорттолгон товарларга тарифтерди өзгөрткөн жок.
Ал тургай Түркиянын Соода министрлиги ошол учурда Вашингтондун Анкараны “тең салмактуу жана позитивдүү соода өнөктөшү” катары көргөнүн айтты.
Министрлик: «Бул жагдай Түркияга өзгөчө Азия жана Латын Америка өлкөлөрүнө салыштырмалуу чоң артыкчылык берет»,-деди.
Министрлик ошондой эле Түркия менен АКШ жетекчилеринин ортосунда болот, унаа жана жез сыяктуу стратегиялык тармактарга карата колдонулган тарифтерге байланыштуу интенсивдүү дипломатиялык жана техникалык сүйлөшүүлөрдүн уланып жатканын билдирди.
Түркия АКШ менен жылдык эки тараптуу соода көлөмүн 100 миллиард доллар деп белгиледи. Бирок учурда эки тараптуу сооданын көлөмү 30 миллиард доллардын тегерегинде.
АКШ Түркиянын экспорт боюнча экинчи ири өнөктөшү болуп саналат жана 2024-жылы жалпы тышкы сатуудагы үлүшү 6,2 пайызды түзгөн. Ошол эле учурда Вашингтон Анкаранын импорт боюнча бешинчи ири өнөктөшү болуп үлүшү 4,7 пайызды түзгөн.
