Мексикада H5N1 куш тумоосуна чалдыккан жана өлкөдө адамда тастыкталган биринчи учур болгон үч жашар кыздын каза тапканын саламаттыкты сактоо кызматкерлери билдиришти.

1-апрелде Улуттук диагностикалык жана эпидемиологиялык маалымдама институту (InDRE) батыштагы Дуранго штатынан келген кыздын вирустун A(H5N1) штамын жуктуруп алганын тастыктады.

Ал дароо коңшу Коахуила штатындагы жеке ооруканага оор абалда жеткирилген.

"Эртең мененки сааттарда 3 жаштагы кыздын трагедиялуу өлүмүн ырастадык", - деди Коахуиланын саламаттыкты сактоо министри Элиуд Агирре шейшемби күнү өткөргөн пресс-конференцияда.

Каза болуу себеби көп органдардын иштебей калышы жана дем алуу жетишсиздиги деп аныкталды.

Агирренин айтымында, инфекциянын булагы азырынча белгисиз жана адистер инфекцияларды көзөмөлдөөнү улантып жатышат, бирок азырынча вирустун башка учурлары катталган жок.

Кыздын туугандары жана аны дарылаган медицина кызматкерлери көзөмөлдө турат.

Учурда 38 адам текшерүүдөн өттү жана алардын бардыгынын жыйынтыгы терс чыкты.

“Биз дайыма сак болууга аракет кылып, жаңы учурлардын пайда болушун алдын алуу үчүн көзөмөлдөп жатабыз. Азырынча, өзгөчө Коауилада жаңы учурлар катталган жок,” - деп кошумчалады Агирре.

Өткөн жылы да Мексика штатында 59 жаштагы эркек киши A(H5N2) вирусунан келип чыккан куш тумоосунан каза болгон.