Кытайдын мамлекеттик CCTV телеканалынын маалыматына ылайык, Кытайдын борборундагы фейерверк дүкөнүндө Ай календары боюнча жаңы жылдык майрамдын экинчи күнүндө болгон жарылуу 12 адамдын өлүмүнө себеп болду.

Кытайда өзгөчө шейшемби күнү белгиленген Ай жаңы жылында фейерверктер жана петардалар кеңири колдонулат.

Борбор шаар Пекин баш болгон бир катар ири шаарлар акыркы жылдары абанын булганышынан улам мындай иш-аракеттерге тыюу салганына карабастан чакан шаарлар жана элет жерлеринде майрам учурунда бир нече күн петардалардын жана «ракета» тибиндеги фейерверктердин үнү угулат.

Кытайдын борбордук телекөрсөтүүсү (CCTV) жергиликтүү бийликке таянып берген маалыматка караганда, «айдын 18инде саат 14:00 чамасында (Гринвич боюнча 06:00), Хубэй провинциясынын Чжэнцзи шаарчасындагы фейерверк саткан дүкөндө өрт чыгып, жарылуу болду».

«Өрт болжол менен 50 чарчы метр аянтты каптаган жана натыйжада 12 адам каза болгон», — деп кошумчалаган телеканал жарылуунун себебинин иликтенип жатканын да билдирди.

Жаңы жылдан бери бул төртүнчү жарылуу

Жекшемби күнү Кытайдын чыгышындагы Цзянсу провинциясында фейерверк дүкөнүндө болгон жарылуудан сегиз адам каза болуп, эки киши жаракат алган.

Өзгөчө кырдаалдарды башкаруу министрлиги бул окуядан кийин өлкө боюнча фейерверк ишканаларын текшерүүнү күчөтүүгө жана коопсуздук тобокелдиктери менен коркунучтарын «толук изилдеп чыгууга» чакырды.

Министрлик ошондой эле жарандарды дүкөндөрдүн жанында фейерверктерди сынап көрүү же тамеки чегүү сыяктуу кооптуу аракеттерден алыс болуу боюнча эскертти.

Кытайда коопсуздук стандарттарынын төмөндүгүнөн улам өндүрүштүк кырсыктар көп кездешет.

Ушул айдын башында өлкөнүн түндүгүндөгү Шаньси провинциясындагы биотехнологиялык заводдо болгон жарылуудан сегиз адам каза болгон.

Ал эми январь айынын аягында Ички Монголия провинциясындагы болот куючу заводдогу жарылуудан кеминде тогуз адам каза тапкан.