Президент Режеп Таййип Эрдоган бейшемби күнү Түркиянын өз коопсуздугун камсыз кылуу үчүн чек араларынан тышкары да бардык керектүү кадамдарды таштаганын, коркунучтарды булагында жок кылып жатканын жана муну жасоо үчүн эч кимден уруксат сурабай турганын билдирди.
Эрдоган борбор шаар Анкарадагы Чанкая сарайында шейиттердин үй-бүлөлөрү менен өткөн ооз ачуу (ифтар) программасында сөз сүйлөп «терроризмден арылган Түркия» максатына жетүүдө олуттуу ийгиликтерге жетишилгендигин белгиледи.
Эрдоган: «Бүгүнкү күндө Түркия өз коопсуздугу үчүн чек ара ичинде гана эмес, чек арадан тышкары жерлерде да тиешелүү кадамдарды таштоодо. Кайсы жерде коркунуч болсо, биз эч кимден уруксат сурабастан, булагында жок кылып жатабыз», — деди.
Эрдоган өзгөчө : “Террорсуз Түркия тууралуу алып барылган иштерде ийгиликтерге жетишилди. Чек араларыбыздын ичинде жана тышында өлкөбүзгө карата коопсуздук коркунучтары олуттуу азайды”,- деди.
Президент: “Жарым кылымга жакын убакыттан бери элибиздин жүрөгүн өйүгөн бул балээден Түркияны түбөлүккө куткарууда чечкиндүүбүз. Муну да 23 жылдан бери шейиттерибиздин жанын аябаган аманатына көө жаппастан, баатырларыбыздын арбагын таарынтпастан, шейиттердин сөөгүн сыздатпастан ишке ашырууну көздөп жатабыз", - деди.
Куралдуу күчтөрдүн жана башка коопсуздук түзүмдөрүнүн ийгиликтүү операцияларынын натыйжасында террордук уюмдардын кыймыл-аракети олуттуу түрдө чектелгенин белгилеген Эрдоган, коргоо өнөр жайындагы жетишкендиктерге токтолду. Ал мурда Түркия коргонуу тармагында 80 пайыз чет өлкөлөргө көз каранды болсо, бүгүнкү күндө ички өндүрүштүн үлүшү 80 пайызга жеткенин билдирди.
Эрдоган: «Бүгүн учкучсуз учуучу аппараттар (ИУА жана СИУА), ракеталар, кемелер, тик учактар жана танктар сыяктуу дээрлик бардык тармактарда өз муктаждыгыбызды өзүбүз камсыздай алабыз. Кудай буюрса, алдыда согуштук учактарды жана учак ташуучу кемелерди чыгаруу кезек келет», — деди.
Коңшу Сириядагы абалга да токтолгон президент ал жерде оң жылыштар болуп жатканын белгилеп :"Сириянын түндүгүндөгү маселени кан төгүлбөстөн чечүү боюнча өткөн айда макулдашууга жетишилди. Толук интеграцияга карай процесс башталды", - деди.
