Алжир мекемелери, Франция менен күчөгөн чыңалуудан улам расмий жана административдик документтеринде, коммуникацияларында французчадан расмий түрдө баш тартып, анын ордуна араб жана англис тилдерин колдонууга өтүп жатышат.
Бейшемби күнү өлкөнүн футбол федерациясы билдирүү жасап, бардык тиешелүү уюмдарга өз ишмердүүлүгүн, кат алышууларын жана байланыштарын "арабдаштырууну" тапшырганын айтты.
Федерация баш катчы Назир Познад 7-майда кол койгон расмий жазууда, дисциплинардык комитеттердин протоколдору менен отчетторун, калыстарды дайындоолорду жана апелляциялык комиссиянын документтерин “арабдаштырууну”, ошондой эле ар кандай мекеме- өнөктөштөр менен бардык кат алышууда араб тилин мүмкүн болушунча тез арада колдонууну милдеттендиргенин билдирди.
Билдирүүдө «Арабдаштыруу» процессинин 2025-2026 спорт сезонуна чейин толугу менен ишке ашырыла турганы белгиленди.
«Туура чечим»
Бул кадам Алжирдин келерки окуу жылынан тартып университеттердеги медициналык билим берүү тилин француз тилинен англис тилине өзгөртүү чечимине туш келди.
Өткөн айда Алжирдин президенти Абдельмаджид Теббун бул өзгөрүүнү колдоп, медициналык билим берүүдө француз тилинен англис тилине өтүүнү "туура чечим" деп сыпаттады.
Алжир менен Франциянын ортосундагы дипломатиялык мамилелер дагы деле туруксуз бойдон калууда, айрыкча 1830-1962-жылдардагы Франциянын Алжирди колониялаштыруусунан келип чыккан чечилбеген маселелерден улам.
Франциянын ички иштер министри Бруно Ретайло Алжирдин мектептерде француз тилин эмес, англис тилин колдонууну каалашынын уланып жаткан кризистин себептеринин бири экенин айткан.
Аналитиктердин айтымында, Алжир француз тилинен баш тартуу процессин 2019-жылдан тарта акырындык менен баштаган.
