Президент Режеп Таййип Эрдоган Түркиядагы армяндардын патриархы Сахак Машалянга жолдогон кайрылуусунда, өлкөнүн биримдигине, өз ара урмат-сыйга жана Биринчи дүйнөлүк согуш учурунда каза болгондордун элесине болгон берилгендигин дагы бир жолу баса белгиледи.
Бейшемби күнү Президенттиктин Коммуникация башкармалыгы тарабынан жарыяланган билдирүүдө Эрдогандын "Армян коомчулугунун урматтуу мүчөлөрүнө чын жүрөктөн салам жолдоп", Түркиянын аймагында кылымдар бою ар түрдүү коомдордун бирге жашап келгенин баса белгилегени” айтылды.
Президент Эрдоган : «Кылымдар бою бул мекенде бирге жашап келдик жана мурдагыдай эле бүгүнкү күндө да кубанычыбызды, кайгыбызды тең бөлүшүүнү улантып жатабыз»,-деди.
“Кандай гана себеп болбосун, биз эч качан бир дагы жараныбыздын дискриминацияга, четтетүүгө же четке кагууга дуушар болушуна жол берген эмеспиз жана бербейбиз", - деп кошумчалады.
1915-жылдагы окуялардын 100 жылдыгы
Эрдогандын билдирүүсү, дүйнө жүзүндөгү армян коомчулугу Осмон империясынын акыркы мезгилинде болгон 1915-жылдагы окуялардын жылдыгын белгилеп жаткан 24-апрелге туш келди.
Эрдоган Биринчи дүйнөлүк согуш учурунда каза болгон Осмон армяндарына урматын жана көңүл айтуу сөздөрүн дагы бир жолу билдирип, бул трагедияны империянын кулашынын алкагында баалады.
“Осмон дөөлөтүнүн акыркы мезгилине туура келген согуш жылдарындагы козголоңдор, күчөгөн бандалык кыймылдар, куралдуу топтордун диверсиялары жана эпидемиялардан улам каза тапкандардын азабын дагы деле жүрөгүбүздө сезип жатабыз” деди.
Президент, өтмүштүн азыркыга же келечекке үстөмдүк кылуусуна жол бербестен, аны менен бетме-бет келүүнүн маанилүүлүгүн баса белгиледи.
"Өткөндүн кайгылуу эскерүүлөрү азыркыны же келечекти туткунга айлантпашы керек деген ишеним менен биз 86 миллион адам (Түркиянын жарандары) катары келечегибизди бирге куруу керектигин түшүнөбүз", - деди.
Биримдик жана өз ара таануу
Эрдоган тарыхты манипуляциялоо менен бөлүп-жаруу аракетине каршы эскертип, мындай аракеттер өлкөнүн коомдук түзүлүшүнө эч качан зыян келтире албаганын айтты.
"Өлкөбүздүн маданий, көркөм, саясий, экономикалык, билим берүү жана социалдык жашоосуна чоң салым кошкон армян жарандарыбыздын тынчтыгы, коопсуздугу жана жыргалчылыгы – башка бардык жарандарыбыздай эле биз үчүн артыкчылыктуу бойдон калат", - деп кошумчалады.
Билдирүүсүн жыйынтыктап жатып Эрдоган Түркиянын алдыга жылышы үчүн биримдикти жана өз ара таанууну улантууга чакырды.
"Түркияны бүгүнкү күнгө чейин бирге алып келгендей эле Түркия кылымын да бирге ийиндешип курабыз", - деди.
"Ай жылдыздуу желектин тынч жана коопсуз көлөкөсүндө, биз ар дайым Түркия Республикасынын ардактуу жарандары катары эркин жашайбыз. Ушул ойлор менен мен армян коомчулугунун өткөндөгү кайгысын чын жүрөктөн бөлүшөрүмдү дагы бир жолу кайталап, каза болгон бардык осмон жарандарын эскеремин",-деди.
