Ирландиянын премьер-министри Майкл Мартин, ок атышууну токтотуу келишимин бузган Израилдин Газага жасаган акыркы чабуулдарын катуу айыптады.

Шаршемби күнү кечинде X платформасында жарыялаган билдирүүсүндө Мартин “Газада 100дөн ашуун адамдын, анын ичинде 46 баланын өмүрүн алган соккуларды катуу айыптайм. Бардык тараптарды ок атышууну токтотуу келишимин сактоого жана аткарууга чакырам. Ошондой эле Газа элине гуманитардык жардамды көбөйтүү зарылдыгын баса белгилейм", - деди.

Мынча көп бейкүнөө адамдардын өмүрүн кыйууну "абдан коркунучтуу" деп мүнөздөгөн Мартин, эл аралык укукту сыйлоо зарылдыгын кайталады.

“Бардык тараптар өздөрүнүн берген убадаларын аткарышы керек жана пландын кийинки этаптарын ишке ашыруу үчүн аракет кылышы зарыл. Ансыз деле өтө көп адамдар жабыркап, каза болду,” - деп кошумчалады.

Мартиндин билдирүүлөрү Палестинанын Саламаттыкты сактоо министрлигинин шейшемби күнү кечинде Израиль армиясы 10-октябрдан бери күчүндө болгон ок атышууну токтотуу келишимин бузуп, 100дөн ашык палестиналыкты, анын ичинде 46 баланы набыт кылганы тууралуу маалыматтарынан кийин айтылды.

Жекшемби күнү геноцидчи Биньямин Нетаньяху Министрлер кабинетине кайрылуусунда, АКШ ортомчулук кылган ок атышууну токтотуу келишимине карабастан Израиль Газадагы душмандарына качан жана кайсы жерде сокку урарын өзү чечерин айткан. Ок атышууну токтотуу келишими, курчоого алынган аймакка эл аралык коопсуздук күчтөрүн жайгаштырууну көздөөдө.

Палестинанын Саламаттыкты сактоо министрлиги Израилдин соңку кол салууларынан 253 адам, анын ичинде 78 бала жана 84 аял жаракат алганын билдирди.

Министрликтин маалыматына ылайык, ок атышууну токтотуу келишими күчүнө киргенден бери Израилдин чабуулдарынан кеминде 211 адам каза болуп, 597 адам жараланды.

2023-жылдын октябрынан бери Израилдин Газага кол салууларынан 68 000ден ашуун адам, көбүнчө аялдар жана балдар каза болуп, 170 000ден ашуун адам жаракат алды.