АКШнын Украинадагы согушту токтотуу боюнча тынчтык сунушу Женевадагы сүйлөшүүлөрдөн кийин 28 пункттан 19 пунктка чейин кыскартылды. АКШнын маалымат каражаттары дүйшөмбү күнү АКШ менен Украинанын расмий өкүлдөрү сүйлөшүүлөрдү конструктивдүү, бирок акыркы эмес деп мүнөздөшкөнүн билдиришти.
АКШнын мамлекеттик катчысы Марко Рубио украиналык жана европалык кесиптештери менен сүйлөшүүлөрдө "чоң" ийгиликтерге жетишилгенин, бирок дагы көп иштөө керек экенин айтты.
АКШ менен Украинанын биргелешкен билдирүүсүндө жыйындын "позицияларды шайкеш келтирүү багытындагы маанилүү прогрессти" көрсөткөндүгү белгиленди.
Сүйлөшүүлөр боюнча маалымат берилген кишилер Financial Times басылмасына оригинал долбоордогу тогуз берененин алып салынганын айтышты, бирок кайсы беренелер экендиги белгиленген жок.
Европалык жетекчилер буга чейин санкциялар жана тоңдурулган орус активдерине байланыштуу айрым пункттарга каршы чыгышкан, анткени алар мындай чечимдердин Европа Биримдигинин ыйгарым укугуна кирерин билдиришкен.
Финляндиянын президенти Александр Стубб кыскартууну «алгылыктуу кадам» деп мүнөздөп бирок бир нече ири маселенин дагы чечилүүсү керектигин баса белгиледи.
Үч жарым жылдан ашыкка созулган согушту токтотуу үчүн АКШнын 28 пункттук планы Женевада каралууда; бул жерде Вашингтон, Киев жана Европанын борбор шаарларынын өкүлдөрү деталдарды талкуулашты.
Трамп ишемби күнү долбоордун Киев жана союздаштарынын арасында тынчсыздануу жаратты деген негиз менен АКШ тарабынан иштелип чыккан пландын "акыркы сунуш" болбой турганын айтты.
Баштапкы долбоордо Украинанын Россияга кошумча аймакты өткөрүп берүүсүн, аскерлеринин санын чектөөсүн жана НАТОго кошулуу өтүнүчүн расмий түрдө токтотуусун талап кылган жоболор камтылган. Трамп Украинага жооп кайтаруу үчүн бейшембиге чейин убакыт берген.
Билдирүүгө жооп катары Украинанын президенти Владимир Зеленский оор тандоого туш болгонун билдирип: "Же биздин ар-намысыбыз, же маанилүү өнөктөшүбүздү жоготуу коркунучу,-" деген.
Ишемби күнү тогуз Европа өлкөсүнүн лидерлери менен Япония, Канада жана Европа Биримдигинин жогорку кызмат адамдары, пландын Украинанын куралдуу күчтөрүнө карата чектөөлөрүнө тынчсыздануусун билдиришип, мунун"Украинаны келечектеги чабуулдарга алсыз калтырат" деп эскертишти.
