АКШнын президенти Дональд Трамп өткөн жуманын аягында керектөөчү технология өнүмдөрү эки тараптуу тарифтерден бошотулат деген кабарларга карама-каршы, смартфондор жана чиптер сыяктуу электроникалык өнүмдөр үчүн тарифтерден бошотуу болбой турганын айтты.
Трамп жекшемби күнү Truth Social эсебиндеги бөлүшүүсүндө, «Башка өлкөлөр бизге каршы колдонгон адилетсиз соода баланстары жана монетардык эмес бажы алымдарынын тарифтеринен ЭЧ КИМ «кутула албайт», өзгөчө бизге эң жаман мамиле кылган Кытай дагы!»-деп жазды.
«Жума күнү эч кандай тарифтик бошотуулар жарыяланган жок. Бул өнүмдөр учурдагы 20% фентанил тарифтерине ылайык бойдон калууда - алар жөн гана башка тарифтик категорияга которулууда», - деп кошумчалады ал.
Трамп:«Фейк маалымат каражаттары муну билет, бирок кабарлоодон баш тартышат. Биз алдыдагы Улуттук коопсуздук Бажы иликтөөсүндө жарым өткөргүчтөрдү жана БҮТКҮЛ ЭЛЕКТРОНИКАЛЫК ЖЕТКИРҮҮ ЧЫНЖЫРЫН карап чыгабыз. Биз Америка Кошмо Штаттарында өнүмдөрдү чыгарышыбыз керек жана башка өлкөлөрдүн, айрыкча Кытай сыяктуу кас соодагерлердин туткунунда кармала албай турганыбыз айкын болууда»,-деди.
«Американын алтын доору, анын ичинде келе жаткан Салык жана жөнгө салуучу кыскартуулар, анын көбү палата жана Сенат тарабынан жактырылган, көбүрөөк жана жакшыраак айлык акы төлөнүүчү жумуш орундары, өнүмдөрдүн өз өлкөбүздө өндүрүлүшү жана башка өлкөлөрдүн, айрыкча Кытай бизге кандай мамиле жасаса, ошондой мамилени көрөт деген түшүнүктү берет»,-деп кошумчалады ал.
АКШнын Бажы жана Чек ара кызматы жума күнү билдирүү таратып, Кытайдын өнүмдөрүнө карай 145% тарифтерден электроникалык товарларынын бошотулганын айтып, мындай өнүмдөр салыктан бошотулат деген үмүттү жараткан.
Бирок соода министри Ховард Лутник жекшемби күнү электроника биротоло бошотулбаганын жана жакынкы айларда күчүнө кире турган жарым өткөргүчтөр үчүн атайын жаңы тарифтер киргизиле турганын айтты.
Кытай башка жактарды карап жатат
Ошол эле учурда Кытай дүйнөлүк экономикалык бороондон корккон өлкөлөргө көз кысып, өзүн туруксуз Вашингтонго караганда ишенимдүү альтернатива катары көрсөтүүгө аракет кылууда.
Си Цзиньпин дүйшөмбү күнү Түштүк-Чыгыш Азияга беш күндүк сапарын баштап, Вьетнам сыяктуу өндүрүштүк кубаттуу өлкөлөлөр менен катар Малайзия жана Камбоджанын лидерлери менен жолугушат.
Трамптын тарифтери жана андан кийинки капыстан саясаттын өзгөрүүлөрү АКШнын экономикасында чоң олку-солкулуктарды жаратты; Инвесторлор мамлекеттик облигацияларды колдон чыгарып, доллар наркын жоготуп, керектөөчүлөрдүн ишеними калбады.
Трампка басымды күчөткөн дагы бир фактор анын тарифтик стратегиясын Уолл Стриттин миллиардерлери, анын ичинде анын тарапташтары тарабынан зыяндуу жана тескери натыйжа берчү деп ачык сынга алуу болду.
Анткен менен Ак үй агрессивдүү саясат өз жемишин берип жатат деп ырастап, ондогон өлкөлөр 90 күндүк тыныгуу аяктаганга чейин келишимге жетишүү максатында АКШ менен соода сүйлөшүүлөрүн баштаганын белгилеп жатат.
АКШнын соода өкүлү Жеймисон Грир CBS телеканалына: «Биз күнү-түнү иштеп, документтерди бөлүшүп, тендердик сунуштарды алып, бул өлкөлөргө пикир айтып жатабыз»,-деди.
