ЮНИСЕФтин жооптуу кызматкери Хамиш Янг Анадолу агенттигине берген маегинде, Газадагы палестиналыктардын чатырларга, желим челектерге, таза ичүүчү сууга, отун, суу өндүрүү жана бөлүштүрүү үчүн жабдууларга, ошондой эле кудуктарды жана туздан тазалоочу жайларды оңдоо үчүн түтүктөргө муктаж экенин айтты.
Янг Дейр-эль-Балахтын чыгышындагы Киссуфим өткөрүү пунктунда командасы менен күтүп жатып, AAга берген маегинде: "Балдардын өмүрүн сактап калуу үчүн керектүү медициналык жана гигиеналык буюмдарды ташыган 50 жүк ташуучу унаабыз өтүү үчүн күтүп жатат", - деди.
Израиль ок атышпоо келишими күчүнө кирген 10-октябрдан бери 653 гумжардам ташыган унаанын Газага киришине уруксат берди. Бирок Газа өкмөтүнүн медиа кеңсесинин директору Исмаил Тавабтанын айтымында, бул сан келишимде каралган күнүмдүк 600 жүк ташуучу унаа квотасынан төмөн.
Өткөн жекшембиде Израиль 173 гумжардам ташыган унааны киргизген. Алардын үчөө газ ташыса, алтоо күйүүчү май ташыган. Бирок дүйшөмбү жана шейшемби күндөрү бир дагы жүк ташуучу унаа кире алган эмес. Шаршемби күнү жардам агымы 480 жүк ташуучу унаа менен кайра башталды.
Газанын медиа кеңсеси жаңыланган маалыматтардын ишемби күнү жарыяланарын билдирди.
Катастрофалык абал
Янг Газадагы абалды "кырсык" деп мүнөздөп, ооруканалардын дээрлик бардыгынын кыйраганын же олуттуу зыянга учураганын, калк тамак-аш жана баш калкалоочу жайлардын жетишсиздигине дуушар болгонун айтты.
ЮНИСЕФтин Газанын түндүгүндөгү ачарчылыктын кесепеттерин жоюу үчүн тез арада чоң көлөмдөгү азык-түлүккө муктаж экенин маалымдады. Янг: "Мен айткан бардык материалдарды алып келүү үчүн мүмкүн болгондун бардыгын жасоо керек",- деди.
Израиль 2023-жылдын 8-октябрында чабуулун баштагандан бери Газадагы палестиналыктар тереңдеген гуманитардык кризис жана ачарчылык менен бетме-бет келүүдө. Бомбалоо жана блокада жарандык инфраструктураны талкалап, саламаттыкты сактоо системасынын кыйрашына себеп болду.
"Газадагы балдар бул колдоого муктаж. Жүктөрдүн келишин күтө албайбыз" ,- деди Янг.
Трамптын ок атышпоо планы
Янг ок атышпоо шарттарына ылайык, жеке камсыздоочулардын товарлары да болгон 600 гумжардам унаасынын Газага күн сайын кириши күтүлгөнүн айтты. Янг өзгөчө Газанын күн сайын 50гө жакын күйүүчү май ташуучу унаага жана тамак бышыруучу газга муктаж экенин белгилеп, буларды "күнүмдүк жашоо үчүн маанилүү" деп мүнөздөдү.
ЮНИСЕФтин расмий өкүлү Газа тилкесинде жардамдын бөлүштүрүлүшү үчүн коопсуз кирүүнүн маанисин баса белгилеп: «Газада эркин жүрүүбүз керек, ушундайча коргоосуз балдарга, энелерине жана аларга кам көргөн үй-бүлөлөргө жете алабыз», - деди.
Израиль 2-марттан бери Газанын чек ара бекеттерин толугу менен жабык кармап, азык-түлүк, дары-дармек жана башка керектүү буюмдардын аймакка киришине тоскоол болууда.
Израилдин Рафах өткөөлүнүн кайра ачылышына тоскоол болушуна байланыштуу миңдеген жардам жүк ташуучу унаалар Египет тарабында күтүүнү улантууда. Израиль чек ара бекетин ачууну израилдик барымтадагылардын калган сөөктөрүн кайтарууга байланыштырды.
Газада ок атышпоо келишими Израиль менен Хамастын ортосунда өткөн аптада АКШнын президенти Дональд Трамп сунуштаган пландын негизинде түзүлгөн.
Биринчи этап израилдик туткундарды палестиналык туткундарга алмаштырууну камтыган. Планда Газаны кайра куруу жана ХАМАСты кошпогон жаңы башкаруу органын түзүү да каралган.
Израилдин 2023-жылдын октябрь айынан берки кол салууларынан көпчүлүгү аялдар жана балдар болгон 68 000 палестиналык каза болду жана Газаны жашоого жараксыз абалга алып келди.
