Иран Бириккен Улуттар Уюмунун Коопсуздук Кеңешине кайрылып, Израиль менен АКШны өлкөгө жасалган акыркы чабуулдардын “баштоочулары” катары таанууну өтүндү.
Жарым расмий Tasnim агенттигинин маалыматына ылайык, Ирандын тышкы иштер министри Аббас Аракчи жекшемби күнү БУУнун баш катчысы Антониу Гутеррешке кат жазып: “Биз Коопсуздук Кеңешинен Израиль режими менен АКШны агрессиянын баштоочулары катары таанууну жана алардын жоопкерчиликтерин, анын ичинде компенсацияларды төлөп берүүсүн моюнга алуусун расмий түрдө талап кылабыз”,-деди.
“Коопсуздук Кеңеши эл аралык тынчтыкты жана коопсуздукту сактап калуу үчүн агрессорлорду жоопко тартууга жана мындай оор кылмыштардын кайталанышына жол бербөөгө тийиш», - деп кошумчалады катта.
"Ошондой эле кол салууга буйрук берген саясий жана аскерий жетекчилер да эл аралык укукка ылайык агрессия кылмышы үчүн жеке жоопкерчиликке тартылышы керек экенин эстен чыгарбоо зарыл" деди.
Израиль менен Ирандын ортосундагы 12 күндүк кагылышуу 13-июнда Израилдин Ирандын аскердик, ядролук жана жарандык объектилерине абадан сокку урууларынан кийин башталган. Ирандын Саламаттыкты сактоо министрлигинин маалыматына караганда, бул чабуулдарда кеминде 606 адам каза болуп, 5 миң 332 адам жаракат алган.
АКШ да бул кагылышууну күчөтүп, Ирандын Фордо, Натанз жана Исфахан шаарларындагы үч ядролук объектилерин бомбалаган.
Тегеран болсо жооп иретинде Израилге каршы ракеталык жана учкучсуз аппараттар менен чабуул жасаган. Кудстагы Ибрани университети тараткан маалыматка караганда, бул кол салууларда кеминде 29 киши каза болуп, 3400дөн киши жаракат алды.
Кагылышуу 24-июнда АКШнын ортомчулугундагы ок атышпоо келишими күчүнө киргенден кийин токтогон.
