Судан Эгемендик Кеңешинин жетекчиси Абдель Фаттах ал-Бурхан парамилитардык Ыкчам колдоо күчтөрү (RSF) тарабынан жайкын тургундарга жасалган кыргындар үчүн өч ала тургандарын убада кылды.

Бурхан шаршемби күнү кечинде армиянын командирлери менен өткөргөн жыйында «Биз Фашир, Жунейна, Жазира жана башка шаарларда RSF куралдуу күчтөрү тарабынан өлтүрүлгөн жана зомбулукка кабылган адамдар үчүн өч алабыз», - деди.

Кеңеш тарабынан жарыяланган билдирүүдө Бурхан “Зулум жана текебердик күчтөрүнүн Суданга каршы жүргүзгөн өнөктүк жеңилет, ал эми Судан эли жеңишке жетет”, – деп кошумчалады.

Ошондой эле армиянын башчысы болгон Бурхан аскерлердин “козголоңчу согушкерледи талкалап, Судан мамлекетинин чек араларын коргоого” болгон чечкиндүүлүгүн кайталады.

«Күч, чечкиндүүлүк жана туруктуулук менен биз жакында козголоңчу топторду жеңип, аларды жок кылабыз», - деди Бурхан.

RSF 26-октябрда Түндүк Дарфур аймагынын борбору жана аймактагы стратегиялык шаар болгон Эль-Фаширди басып алып, жергиликтүү жана эл аралык уюмдардын маалыматына караганда, жайкын тургундарды массалык түрдө өлтүргөн. Бул окуя согуштан жабыркаган өлкөнүн географиялык бөлүнүшүнө алып келиши мүмкүн деген эскертүүлөрдү жаратты.

Бириккен Улуттар Уюмунун 2024-жылдын январындагы отчетуна ылайык, Жунейнадагы RSF жана анын союздаш топтору тарабынан жасалган этникалык негиздеги зомбулуктан аймактын губернаторун кошкондо 10 000ден 15 000ге чейин адам каза тапты.

RSF учурда Судандын 18 облусунун ичинен батыштагы Дарфур аймагынын беш аймагынын бардыгын көзөмөлдөйт, бирок Түндүк Дарфурдун айрым түндүк аймактары дагы деле армиянын көзөмөлүндө. Ал эми Судан армиясы борбор калаа Хартум баш болгон түштүк, түндүк, чыгыш жана борбордук аймактардагы калган 13 облустун көбүн көзөмөлдөйт.

Судан армиясы менен RSFтин ортосундагы 2023-жылдын 15-апрелинен бери уланып келе жаткан согуш аймактык жана эл аралык ортомчулук аракеттерине карабастан чечиле элек. Бул кагылышуу миңдеген адамдардын өлүмүнө жана миллиондогон адамдардын жер которушуна алып келди.