Европа Биримдигинин тышкы саясат боюнча жетекчиси Кая Каллас бейшемби күнү Көп тараптуулук жана тынчтык үчүн дипломатиянын эл аралык күнүнө карата билдирүүсүндө эл аралык тартипке кысым күчөп баратканын айтты.

Бейшемби күнү Европанын тышкы байланыштар кызматы тарабынан жарыяланган билдирүүдө Калластын: "Дүйнө орчундуу мезгилде турат" дегени маалымдалды.

Каллас эл аралык укук бурмаланып, этибарга алынбай же ачыктан-ачык бузулуп жатканын; тынчтыкты жана коопсуздукту сактоо максатында түзүлгөн мекемелерге болсо шек келтирилип жатканын кабарлады.

Орусия-Украина согушу менен Жакынкы Чыгыш жана Судандагы согуштарды эрежелерге негизделген эл аралык тартипке кысымдын күчөшүнүн мисалдары катары айткан Каллас: "БУУнун Уставынын принциптери түздөн-түз чабуулга кабылууда", - деп билдирди жана БУУ дүйнөлүк кызыкчылыктарды чагылдыруу үчүн легитимдүүлүгү бар жалгыз универсалдуу алкак бойдон кала берерин, бирок легитимдүүлүктүн өзү жетишсиз экенин кошумчалады.

Каллас көп тараптуулук эскиргендиктен эмес, анын принциптери корголбой же аткарылбай жаткандыктан кыйрап жатканын баса белгилеп, Европа Биримдиги көп тараптуу системаны чыңдоого, аны натыйжалуураак, инклюзивдүү жана жоопкерчиликтүү кылууга умтулаарын билдирди.

Каллас ошондой эле жергиликтүү активисттерди, аялдарды, жарандык коомду жана жаштарды камтыган тынчтык процесстеринин жана ортомчулук аракеттердин маанилүүлүгүн баса белгиледи.